Міністэрства гандлю запатрабавала карыстацца айчыннымі сярпамі і ноўтбукамі

Міністэрства антыманапольнага развіцця і гандлю апублікавала новы пералік тавараў для «імпартазамяшчэння».

У абноўлены пералік спажывецкіх тавараў, прапанаваных «для асваення іх вытворчасці, выпуску імпартазамяшчальнай прадукцыі і развіцця асартыменту з улікам кан'юнктуры рынку» Міністэрства антыманапольнага развіцця і гандлю (МАРГ) у 2017 годзе ўключыла 223 пазіцыі (на тры больш, чым летась), піша «Заўтра тваёй краіны».

Спіс пашырыўся за кошт электрычных мульціварак (прыкладная патрэба, паводле ацэнак ведамства, 20 тысяч штук) і пыласосаў (50 тысяч), посуду «з касцянога, рэльефнага, танкасценнага, ружовага фарфору» (20 тысяч), формаў для выпечкі (30 тысяч), арматуры для змыўнога бачка (100 тысяч).

У новым пераліку ўпершыню фігуруюць таксама кампутарныя мышы «аптычныя, святлодыёдныя, правадныя і бесправадныя, для правай і левай рукі, сучаснага дызайну» (150 тысяч штук), тканіны «шаўковыя для сукенак і гарнітураў, блузак, кашуляў» (300 тысяч пагонных метраў), сухія малочныя сумесі на аснове казінага малака (200 тон) і некаторыя іншыя прадукты.

У шэрагу тавараў асартыментнага пераліку ў 2017 годзе МАРГ паменшыў рэкамендаваны аб'ёмы. У параўнанні з мінулым годам, патрэба ў шчотках і швабрах «шырокага асартыменту» скарацілася з 500 тысяч да 50 тысяч, манікюрных набораў — з 1000 тысяч да 100 тысяч, парасонаў – са 120 тысяч да 20 тысяч, шпілек, абручоў, гумак для валасоў – з 10 000 да 500 тысяч, лічбавых фотаапаратаў – з 1000 тысяч да 100 тысяч, відэакамер – са 100 тысяч да 50 тысяч штук. Прыкметны прагрэс па шапкам для плавання, патрэба ў іх вытворчасці ўпала з 1000 тысячы да 500 тысяч штук.

Не змяніліся за год рэкамендацыі МАРГ у арганізацыі вытворчасці 5 тысяч сярпоў, 50 тысяч планшэтаў, 100 тысяч ноўтбукаў і 1000 тысяч смартфонаў, 5000 тысяч фламастараў у наборы, 1000 тысяч тачылак для алоўкаў і 2000 тысяч сцірак, 1000 тон заменніка цукру і большасці іншых тавараў.

Што тычыцца лакальных перамог імпартазамяшчэння, то з пераліку тавараў, якія наогул не вырабляліся ў Беларусі, за мінулыя гады зніклі косы (у спісе 2016 года іх патрэба ацэньвалася ў 13 тысяч штук), замарожаная бульба фры (4000 тон), баксёрскія пальчаткі (10 тысяч штук), самакаты (100 тысяч штук), шакаладныя батончыкі з вафлямі (390 тон), жавальныя цукеркі (300 тон) і некаторыя іншыя прадукты.

МАРГ таксама абнавіў пералік тавараў, якія вырабляюцца ў Беларусі альбо ў недастатковым аб'ёме і асартыменце, альбо «не цалкам задавальняюць попыт у асобных параметрах». У яго ў 2017 годзе ўвайшлі 167 тавараў.

Нагадаем, што раней Дзяржстандарт прызнаў амаль усе ўвезеныя ў 2016 годзе ў Беларусь жаночыя панчошны вырабы не адпаведнымі нормам Мытнага саюза.