Аляксандр Саладуха выпусціў новы альбом

Беларускі спявак выпусціў 11 сольны альбом «Мы будзем разам», грошы на які спрабаваў сабраць праз краўдфандынг.

Tut.by пагутарыла з музыкам і даведалася, чым новы альбом адрозніваецца ад папярэдніх, і ў колькі абышоўся яго выпуск і адкуль усё-такі ўзяліся грошы на праект.

Нагадаем, грошы на альбом (40 тысяч рублёў) спявак спрабаваў сабраць праз краўдфандынг. Дзеля гэтага ён быў гатовы знайсці ўсім ахвотным другую палову, выступіць на прыватным мерапрыемстве, а яшчэ прапаноўваў паўдзельнічаць у квэсце і вечарынцы. У вобразе купідона ў падтрымку «Марафону любові» (так называлася краўдфандынгавая кампанія) Аляксандр нават праспяваў некалькі песень у пераходзе ля ГУМа.

— «Вулей» дамагаўся мяне разоў пяць-сем, тэлефанавалі, я заўсёды быў заняты. Наогул не ведаў, што так можна збіраць грошы на новы альбом. Касцюм мне пашылі даслоўна за чатыры дні, а крылы бралі ў арэнду ў Оперным тэатры, — распавядае спявак.

«Марафон любові» працягваўся 45 дзён, але грошы на новы альбом сабраць так і не атрымалася.

— Але дзякуючы гэтай акцыі ў мяне столькі пайшло заказаў! Звар'яцелае колькасць. Верасень — 26 заказных мерапрыемстваў, кастрычнік — 22, лістапад, снежань, Новы год — каскад заказаў. Вяселля, дні нараджэння, карпаратывы, юбілеі. Так што на новы альбом я зарабіў сам, сваімі выступамі і сваім імем.

Спявак распавядае, што да першай песні альбома «Чорныя крумкачы» (заяўку з якой ён падаваў на беларускі адбор «Еўравізіі» летась) прыступіў у снежні 2015-га. Усяго праца над альбомам, у які увайшло 10 песень і адзін відэакліп, заняла год. Уклалі ў альбом больш за 30 тысяч даляраў.

— З дзесяці трэкаў адзін рэмікс, які зрабіў малады хлопец з Менска. Рэмікс распальвае. Думаю, яго возьмуць і клубы, і моладзевыя радыёстанцыі, — кажа Аляксандр.

Кампакт-дыскі з новым альбом (іх выпусцілі блізу тысячы) будуць прадавацца ў крамах і на запраўках. Пачуць альбом у інтэрнэце пакуль нельга.

— Хочацца, каб яго куплялі. Трымалі ў руках, вокладка такая прыгожая! Для яе мы выкарыстоўвалі фотасесію ў вобразе купідона. Думаю, потым песні будуць у інтэрнэце. Мае сыны гэтым займаюцца, каб песні пачуў увесь свет.

Аляксандр Саладуха кажа, што новы альбом не атрымаўся б такім, калі б не задумка «Улея». Ён таксама ўдзячны музычнаму прадусару Алегу Елісеенку і аранжыроўшчыку Андрэю Ктытарову. А яшчэ ўсім аўтарам і кампазітарам, жонцы, дачцы і сынам.

— Я вельмі рады і шчаслівы, што ён выйшаў. Тым больш у такі няпросты час: курс расце, але мы ўсё роўна змаглі гэта зрабіць.