Бразілец у ЗША захоўваў $20 мільёнаў гатоўкай пад ложкам
6- 25.01.2017, 18:24
- 24,645
Паліцыя канфіскавала ўсю суму, якую знайшла схаванымі ў каркасе пад матрацам у адной з кватэр Масачусэца.
Улады мяркуюць, што грошы звязаныя з фінансавай пірамідай TelexFree, ад якой пацярпелі больш за мільён чалавек, піша BBC.
Амерыканскія праваахоўныя органы сачылі за бразільцам Клебэрам Рэнэ Рызэрыё Року, якому былі выстаўленыя абвінавачванні ў сувязі з фінансавай пірамідай. Пры ператрусе ў яго кватэры ў горадзе Уэстбора і былі знойдзеныя грошы.
Рока быў арыштаваны паводле абвінавачвання ў змове з мэтай адмывання грошай. На думку пракуратуры, Рока з'яўляецца адным са звёнаў у схеме пералічэння мільёнаў даляраў у Бразілію праз Ганконг.
TelexFree — гэта адна з найбуйнейшых фінансавых пірамід у Бразіліі, якая сабрала са сваіх кліентаў прыкладна мільярд даляраў. Кампанія працавала ў розных краінах свету. Афіцыйна кампанія прадавала паслугі IP-тэлефаніі. Аднак, напраўду, яна зарабляла прыцягненнем людзей, якія жадаюць прадаваць яе пакеты сувязі і размяшчаць яе рэкламу. За гэтую магчымасць яны павінны былі зрабіць у кампанію ўнёскі, а TelexFree затым выплачвала ім грошы.
Грошы на выплаты кампанія брала са сродкаў, якія ёй прыносілі новыя ахвотныя прадаваць яе прадукты. Прычым часта гэта былі сябры і сваякі тых, хто ўжо «працаваў» на TelexFree.
Паводле звестак амерыканскіх праваахоўных органаў, тысячы людзей, такім чынам, рэкламавалі паслугі кампаніі ў інтэрнэце.