У «Менсктрансе» патлумачылі, чаму тралейбус цягнуў па тратуары чалавека

Чыноўнікі прызналі віну кіроўцы, але і пасажыраў папракнулі ў няўважлівасці.

24 студзеня на вуліцы Лабанка кіроўца тралейбуса заціснуў дзвярыма пасажыра і працягнуў яго некалькі метраў. ДТЗ адбылося на прыпынку каля «Мацерыка» – відэа, якое зняў сведка, не для слабанервных.

Выпадак пракаментавалі tut.by у тралейбусным парку №4 і ГП «Менсктранс».

Як высветлілася, пра інцыдэнт кіроўца тралейбуса №13 на працы не паведамляў. Навіну ў кампаніі даведаліся з інтэрнэту.

Падчас гутаркі з кіраўніцтвам кіроўца распавёў, што не заўважыў чалавека. Аднак чытач, які даслаў відэа, растлумачыў: ён пасігналіў кіроўцу, выйшаў з машыны і паказаў на пажылога чалавека, якога заціснула ў дзвярах, – ён стаяў на прыпынку. Рэакцыя кіроўцы апынулася нечаканай: ён уключыў аварыйку, выйшаў з тралейбуса, выслухаў відавочцу, кіўнуў і з'ехаў.

«Віна ў дзеяннях кіроўцы ёсць: ён не пераканаўся ў заканчэнні пасадкі-высадкі пасажыраў і пачаў рух. Тым не менш ён потым спыніўся і выйшаў на прыпыначны пункт, але пацярпелага ўжо не было, у салоне людзей таксама не было. Таму ён прыняў рашэнне пра далейшы рух, – распавёў начальнік упраўлення бяспекі руху «Менсктранса» Канстанцін Галалобаў. – Але кіроўцы мы пакараем – пазбавім прэміі, каб адчуў».

Як распавёў чыноўнік, калі ёсць перашкода, праз якую дзверы тралейбуса цалкам не зачыніліся, то машына не кранецца з месца. У гэтым выпадку пасажыру «заціснула толькі пальцы – на такую невялікую перашкоду блакаванне не спрацавала».

Канстанцін Галалобаў: «У люстэрка задняга выгляду, кіроўца бачыць не больш чым паўтара метра ад тралейбуса. А людзі часам рэзка выбягаюць з-за паветак, шапікаў, з ходу улятаюць у дзверы, якія зачыняюцца. На Каменнай Горцы гэта адбываецца пастаянна. Людзі забываюць, што ёсць правілы, што пасля аб'явы аб заканчэнні высадкі і пасадкі пасажырам забаронена перашкаджаць закрыццю дзвярэй. Пасажырам трэба быць больш уважлівымі».