Леанід Заіка: Дэкрэт аб «адкупных» - абсалютны абсурд

Сітуацыя з бізнэсам у Беларусі з'яўляецца вынікам няправільнага выбару ўладамі шляху развіцця.

Кіраўнік аналітычнага цэнтра «Стратэгія», эканаміст Леанід Заіка ў інтэрв'ю «Радыё Рацыя» пракаментаваў магчымае ўвядзенне дэкрэта «Пра забеспячальны дэпазіт», згодна з якім бізнэсоўцам прапануюць папярэдне ўнесці на спецыяльны рахунак 50 тысяч рублёў, каб у будучыні не патрапіць у СІЗА.

- Не ведаю, наколькі сур'ёзна можна казаць пра такога кшталту ініцыятывы, бо яны абсалютна абсурдныя. Лепш абмяркоўваць не магчымыя пасадкі бізнэсоўцаў за краты, а стварэнне добрага бізнэс-клімату ў Беларусі, - заявіў Леанід Заіка.

- Што сёння перш за ўсё трэба бізнэсу?

- У першую чаргу трэба аддаць бізнэсу ўсе арандаваныя плошчы. Па-другое, у кожным рэгіёне даць бізнэсоўцам бясплатна па 10 гектараў зямлі ў бестэрміновае карыстанне. І трэцяе - наогул нічога не трэба казаць пра бізнэс паўтара года. Нават не ўзгадваць пра яго ні на ніжэйшым узроўні, ні на вышэйшым. Як гаворыцца, грошы любяць цішыню. А наогул, сітуацыя складаная.

Як казаў Напалеон, не жадаеце карміць сваё войска - будзеце карміць чужое. А мы сёння практычна кормім замежны бізнэс: расейскі, літоўскі...У нас жа амаль усе гандлёвыя сеткі захопленыя замежнікамі, мы арабам і кітайцам зямлю раздаём. Гэта злачынства перад беларускім бізнэсам, які, мякка кажучы, стаў ахвярай няправільнага выбару шляху развіцця. Калі гэта ініцыятыва чыноўнікаў, то іх трэба караць напоўніцу.