«Хацеў ісці ў ЖЭС з сякерай»

Жыхары сталінкі ў цэнтры Менска два тыдні жывуць амаль без вады.

«Жыццё ў апошнія два тыдні стала проста невыносным, - напісала на сваёй старонцы ў фэйсбуку дызайнерка Наталля Поткіна. - Жыву на вуліцы Чырвонаармейская, 16. Тыя, хто тут часта бывае, у курсе, што на працягу некалькіх гадоў на тыдзень-месяц перакрываюць дарогу, каб чарговы раз адрамантаваць каналізацыю і вадаправод. Улетку быў капітальны рамонт цепласетак. Тры дні назад трубы засыпалі, а мы ўзрадаваліся, што нарэшце-то ўсё скончылася. Але два тыдні таму вада зноў знікла. І калі з'яўляецца, то напор такі слабы, што з крана льецца тонкая нітачка вады - шклянка набіраецца некалькі хвілін. Малю аб падтрымцы! Нам патрэбна вада!»

Каля дома на Чырвонаармейскай, 16, дзе ў жыхароў два тыдні няма вады, мы выявілі цыстэрну з вадой, піша tut.by.

Ад яе да пад'езда з поўнымі вёдрамі ішоў мужчына. Выгляд у яго быў далёка не радасны. Зрэшты, калі прыкінуць, колькі разоў прыйдзецца яшчэ спусціцца ўніз па ваду, зразумець яго настрой можна.

- Добра, што ваду сёння прывезлі, а то збіраўся ў ЖЭС ісці з сякерай, - вобразна выказаўся мясцовы жыхар. - Няма ўжо сіл трываць усё гэта, шчыра кажу.

Наталля Поткіна стаяла побач, чакала работнікаў «Менскводаканала», якія выехалі на месца.

- У гэтым доме жыву ўсяго два з паловай гады. Суседзі ў нас проста выдатныя людзі - над намі жыве лекарка, якая прыняла на свет шмат дзетак. Цяпер вось на пенсіі. У пад'ездзе ёсць бабуля, якой ужо 103 гады. Добра мы, маладыя, але як ёй у такім узросце жыць без вады?

Зрэшты, у самой Наталлі, як і ў любой гаспадыні, без вады не жыццё, а пакуты. Гара посуду ў мыйцы, у ваннай зноў «паляцеў» кран.

- Калі вада і ёсць у кране, то ідзе тонкім струменьчыкам - ні памыцца, ні памыць. Сям'я - чатыры чалавекі. У будні, калі ўдзень большая частка жыхароў на працы, напор вады павялічваецца, але калі запусціць пральную машыну - яна вісне, ёй напору не стае. Вечарам або наогул няма вады (ні халоднай, ні гарачай), або слабы напор. Праз дрэнную якасць вады, якая часта ідзе з пяском, сапсавалася сантэхніка. Вось чакаю майстра. І так жывём апошнія два тыдні. Шчыра кажучы, не ўяўляю, як спраўляюцца мае суседкі-бабулі, якія не маюць ні сіл, ні здароўя.

Наталля распавяла, што ўвесь гэты час яны з мужам спрабавалі высветліць, у чым прычына адсутнасці вады.

- У ЖЭСе заяўку не прынялі і адправілі разбірацца з «водаканалам». Але і там спачатку заяўку не прынялі. Муж званкамі дамогся таго, што змог даведацца прычыну, чаму не ідзе вада. Яму расказалі, што калі праводзілі капітальны рамонт, абвалілася нейкая засаўка, якая перакрыла нам усю ваду. Але так як усе ўжо закапалі, то як быць далей, ніхто не ведае і нічым дапамагчы не могуць. У сераду ўжо паклалі на ўсю дарогу асфальт...

У чацвер, са слоў Наталлі Поткінай, упершыню за два тыдні жыхарам прывезлі цыстэрну з вадой.

- І гэта ўсё толькі пасля званкоў на гарачую лінію 115, у «Водаканал» і ЖЭС. Але дагэтуль ніхто не адказаў на наша пытанне аб тым, калі ж з'явіцца вада? Колькі людзям яшчэ трэба трываць?

Афіцыйна

- Перакладка цепласетак - не зона адказнасці «Менскводаканала». Першая заяўка з нагоды слабога ціску вады паступіла ад ЖЭСа на сеткавы раён №2 увечары чацвярга 5 кастрычніка. З 6 да 8 кастрычніка, сумесна з ЖЭСам, было праведзенае першаснае абследаванне сетак. Прычыну слабага ціску ў гэтым доме высветліць не ўдалося.

9-10 кастрычніка абследаванне найбліжэйшых сетак працягвалася. 11 кастрычніка ў час правядзення работ, а 20.30 паступіла паўторная заява ў цэнтральную дыспетчарскую «Менскводаканала» са скаргай на нізкі ціск вады. Калі б гаворка ў заяўцы ішла аб адсутнасці вады - людзям адразу ж прывезлі цыстэрну з пітной вадой. Гэта стандартная практыка, - пракаментаваў сітуацыю Андрэй Маеўскі, выканаўца абавязку начальніка вытворчасці «Менскводаправод» УП «Менскводаканал». - 12 кастрычніка зладзілі шэраг тэхнічных мерапрыемстваў па гідрапнеўматычным прамыванні сетак да дома па Чырвонаармейскай, 16. Гэтыя мерапрыемствы жаданага выніку не далі. Сёння, 13 кастрычніка, будуць праведзены работы ў аднаўленні халоднага водазабеспячэння. Увечары ў людзей будзе вада.