Пенсіянерка з Жодзіна: На падарункі грошай зусім не стае, усё выдаткаванае на лекі

Беларусы расказалі, што будуць дарыць на Новы год і аб чым просяць Дзеда Мароза.

Вынікі апытання, якое правёў ex-press.by, паказалі, што прыкладна ў паловы рэспандэнтаў з Жодзіна і Барысава «грошай няма зусім», каб набыць добрыя падарункі блізкім да Новага 2018 года - стае толькі на забаўкі. Яшчэ частка апытаных нічога не будзе прасіць у Дзеда Мароза, бо ім «няёмка за марнаванні родных».

Ірына Яўгенаўна, 68 гадоў (Жодзіна):

- Нядаўна прыязджала да мяне сяброўка з-за мяжы, з Італіі. Прывезла падаруначкі. Вось я цяпер на Новы год і дару тое, што яна мне падарыла. Каб зрабіць падарункі самой, то няма грошай зусім. Унучцы Каці размалёўку за 4 рублі набыла. Унучцы Ксеніі - салодкі падарунак за 8 рублёў. Дзяўчынкам італійка мая перадала фуфаечку і піжамку. Нявестцы - шкарпэткі (мне не падышлі). Сватам пакуль не прыдумала. Больш нікому і нічога. Усё патрачанае на лекі. А сабе я нічога не загадвала, хоць і пытаюцца. Мне няёмка, каб на мяне марнавалі грошы.

Піліп, 40 гадоў (Жодзіна):

- Я ўжо некалькі гадоў сустракаю Новы год з катом. Кату свініну набываю і ўсё... Сам падарункі матэрыяльныя ў Мароза не прашу, проста хацелася, каб збылося што-небудзь актуальнае, што сабе зычу...Сёлета я нават яшчэ не ведаю, што дарыць маме, якая жыве ў Маскве. Яна нянькай працуе, зарабляе больш чым я, інжынер. Раней маме дарыў, калі разам жылі, тое, чаго ў яе не было. Цяпер у яе ёсць усё...

Вольга, 40 гадоў (Барысаў):

- Заўсёды была мара - камін. Але цяпер гэта недасягальна, з цяперашнімі даходамі. Ды і месца для каміна не гатовае. Рамонт так і не дарабіла... Сёння наогул свята бязрадасна сустракаю. Можа таму, што надвор'е такое, не зімовае. Няма ў душы свята... Так што не замовіла Дзеду Марозу нічагуткі. Падарункі набыла блізкім чыста сімвалічныя - забаўкі. Мама і свякроў прыедуць. Ім куплю формы для запякання ў духоўцы. А мужу і сыну пакуль не ведаю што.

Пятро, 32 гады (Жодзіна):

- Цяпер крамы танныя ёсць, аднаго кошту - усё па 2.40. Учора быў там, ва ўніверсаме. Набыў дачцэ сувенір - сабачку. Жонцы набор навагодніх сурвэтак на стол, бацьку і маме па кубку. Яшчэ набыў цацкі і мішуру. Уклаўся ў 25 рублёў. Пры тым, што яшчэ мы ў двары, усім домам, адзначаем Новы год і елку прыбіраем, набыў для яе два велізарныя боты з дроту і мішуру. А што я хачу ад Дзеда Мароза, мае жонка і мама лепш ведаюць.

Алег, 34 гады (Барысаў):

- Люблю гэтае чароўнае свята з дзяцінства, рыхтуюся да яго задоўга. Дарыць буду, як звычайна, не матэрыяльнае, але творчае: навагодні стол з новай стравай, песні, свечкі, прыгажосць і выдумку...Сам таксама вельмі люблю ў гэты цёмны час года разнастайныя ліхтарыкі, электрычныя гірлянды, феейрверк. Мае сябры мяне такімі падарункамі песцяць.

Вольга, 45 гадоў (Жодзіна):

- Я Новы год перастала прызнаваць, яшчэ калі бухгалтарам у кампаніі па продажы цацак працавала. Напэўна, усё адтуль і цягнецца. У іх продаж елак і навагодніх аксесуараў пачынаецца ўжо з верасня, да снежня ўжо ўсё надакучыла. Цяпер мне ўжо хочацца, каб хутчэй гэтае свята прайшло. У нас нядаўна быў карпаратыў на працы. Сама бяседа абышоўся мне 50 рублёў, сукенка - 98, туфлі - 90. Цырульня, манікюр, візаж - 55 рублёў. Таксоўка яшчэ, і іншыя дробязі... Якія тут яшчэ могуць быць падарункі? І пра якія жаданні я магу яшчэ заікнуцца? А я ж на карпаратыў не хацела - гэта нас начальства абавязала прыйсці.