Таксісты патрабуюць скасаваць двайную мыту на аўто

З ініцыятывай выступіў прафсаюз таксі «Цэнтр».

Прафсаюз кіроўцаў таксі «Цэнтр» стварыў петыцыю аб скасаванні двайной аплаты дзяржаўнай мыты для аўтамабіляў-таксі цягам года, піша сайт abw.by.

Адпаведная інфармацыя размешчана на сайце петыцый change.org.

«Згодна з дзейным заканадаўствам, аўтамабілі-таксі праходзяць абавязковую працэдуру дзяржаўнага тэхагляду два разы ў год. Пры гэтым дзяржаўная мыта на допуск аўтамабіляў да ўдзелу ў дарожным руху выплачваецца кожны раз у поўным аб'ёме – двойчы ў год. Гэта павялічвае падатковую нагрузку на таксістаў і не зусім справядліва ў дачыненні да іх, бо аўтамабілі-таксі па інтэнсіўнасці эксплуатацыі і ўздзеяння на дарогу нічым не саступаюць аўтамабілям, занятым, напрыклад, у дастаўцы тавараў народнага спажывання. У сувязі з гэтым просім унесці змены ў частку трэцюю пункта 8 артыкула 250 асаблівай часткі Падатковага кодэкса Рэспублікі Беларусь і знізіць стаўку дзяржаўнай мыты на каэфіцыент 0,5 – гэта значыць дазволіць кіроўцам таксі пры праходжанні дзяржаўнага тэхагляду два разы на год плаціць дзяржаўную мыту ў аднаразовай суме, а менавіта – па палове ўсёй сумы пры кожным тэхаглядзе», - сказана ў петыцыі.

Паводле інфармацыі складальніка петыцыі, у выдатках не ўлічваецца нават мінімальны заробак, і, такім чынам, і магчымасць утрымліваць свае сем'і, аплачваць камунальныя паслугі, і т. п. «Адмоўнае сальда кампенсуецца за кошт ушчамлення ўласных інтарэсаў кіроўцаў таксі, такіх як вымушаныя парушэнні адлічэнняў сродкаў у ФСАН, адпаведна чалавек страчвае права на годнае пенсійнае забеспячэнне, а таксама за кошт пераразмеркавання сродкаў, неабходных для абнаўлення аўтамабіля раз у 5 гадоў, з прычыны чаго пасля прыходу асабістага аўтамабіля ў непрыдатнасць кіроўца губляе магчымасць у далейшым працаваць у гэтай сферы.

З мэтай зніжэння падатковай нагрузкі на ўладальнікаў транспартных сродкаў, прызначаных для перавозкі небяспечных грузаў, з 2015 г. часткай трэцяй пункта 8 артыкула 250 асаблівай часткі Падатковага кодэкса Рэспублікі Беларусь устаноўлена паніжэнне стаўкі дзяржаўнай мыты на каэфіцыент 0,5. Чаму б не зрабіць тое ж самае для аўтамабіляў-таксі?!»

Як распавёў журналістам старшыня прафсаюза Аляксандр Стахоўскі, раней з просьбай паменшыць і «распалавініць» дзяржаўную мыту прафсаюз звяртаўся ў Міністэрства фінансаў, адкуль быў атрыманы адказ у духу «шмат ездзіце - значыць, павінны плаціць больш».