Лінкявічус: Вайскоўцы ЗША павінны стала знаходзіцца ў Літве

Літва выступае за сталую прысутнасць амерыканскіх вайскоўцаў на тэрыторыі сваёй краіны.

Пра гэта заявіў кіраўнік МЗС Літвы Лінас Лінкявічус, паведамляе delfi.lt (пераклад - tut.by).

«Мы выступаем за сталую прысутнасць [амерыканскіх войскаў], бо наш уласны [ваенны] кантынгент вельмі абмежаваны», - сказаў Лінкявічус. Ён таксама дадаў, што звярнуўся з такой просьбай да намесніка міністра абароны ЗША Роберта Ворка і намесніка дзяржсакратара штатаў Томаса Шэнана.

Канстытуцыя Літвы забараняе знаходжанне вайсковых баз іншых дзяржаў на тэрыторыі краіны. Аднак кіраўнік літоўскага МЗС мяркуе, што размяшчаць амерыканскія войскі на сталай аснове можна, калі краіна дасць права карыстацца ім сваімі базамі, тады як права ўласнасці на іх застаецца за Літвой.

Таксама Лінкявічус распавёў амерыканскім калегам, што найважнейшым пунктам для Літвы застаецца пытанне супрацьпаветранай абароны. З ягоных слоў, у Літвы яе «практычна няма».

Нагадаем, краіны NATO 8 ліпеня 2016 года дамовіліся аб стварэнні чатырох батальёнаў у Прыбалтыцы і Польшчы. Як паведамляў генеральны сакратар альянсу Енс Столтэнберг, вайскоўцы будуць знаходзіцца ў краінах Усходняй Еўропы ў якасці «фактару стрымлівання». 3 студзеня 2017 г прадстаўнік Міністэрства абароны Літвы Аста Галдзікайт паведаміла, што вайскоўцы падраздзяленняў спецыяльнага прызначэння ЗША дыслакаваныя ў Літве.