Мэркель падтрымала канцэпцыю дзвюх дзяржаў на Блізкім Усходзе
- 25.03.2017, 12:15
- 7,626
Ізраільскі і палестынскі народы маюць права жыць у міры і бяспецы.
Мірнае суіснаванне ізраільскай і палестынскай дзяржаў з'яўляецца адзінай гарантыяй міру на Блізкім Усходзе, заявіла канцлерка ФРГ, піша Delfi.
Ангела Мэркель пацвердзіла прыхільнасць Нямеччыны канцэпцыі дзвюх дзяржаў - ізраільскай і палестынскай на Блізкім Усходзе.
"Я, як і раней, не бачу разумнай альтэрнатывы мэце стварэння дзвюх дзяржаў", - заявіла Мэркель у пятніцу, 24 сакавіка, у Бэрліне на сустрэчы з кіраўніком Палестынскай аўтаноміі Махмудам Абасам. Ізраільскі ды палестынскія народы маюць права "жыць у міры і бяспецы", дадала канцлерка ФРГ, і гарантаваць гэтага не можа ні адзін варыянт, акрамя стварэння дзвюх дзяржаў.
У гутарцы з Абасам канцлерка ФРГ падкрэсліла, што для рэалізацыі ідэі ізраільскай ды палестынскай дзяржаў патрэбная "пазітыўная дынаміка". Са слоў Мэркель, яна заўсёды выступае за мэтазгоднасць наўпроставых перамоў паміж старанамі канфлікту. Махмуд Абас, у сваю чаргу, запэўніў Мэркель у тым, што кіраўніцтва Палестынскай аўтаноміі таксама падтрымлівае ідэю мірнага суіснавання дзвюх дзяржаў, дадаўшы, што гэта з'яўляецца адзіным спосабам дасягнуць "ўсёабдымнага і справядлівага міру". Ён падзякаваў Бэрліну за матэрыяльную, палітычную і маральную падтрымку аўтаноміі і выказаў надзею на тое, што ФРГ зможа стаць пасярэднікам ва ўрэгуляванні ізраільска-палестынскага канфлікту.