Пацучыная хітрасць Пуціна

Як хуліган з трушчоб стаў прэзідэнтам РФ.

Таблоід Daily Mirror (пераклад - rus.delfi.ee) на першай паласе рэкламуе з паметкай «эксклюзіў» артыкул свайго карэспандэнта пра цяжкае дзяцінства Уладзіміра Пуціна. Артыкул называецца «Вулічны хуліган: як бандыт з трушчоб стаў прэзідэнтам Расеі».

Карэспандэнт выдання з'ездзіў у Пецярбург, знайшоў камуналку, у якой жыла сям'я Пуціных і пагутарыў з тымі, хто яго ведаў у тыя гады.

«У гэтых падваротнях ён навучыўся выжываць, — цытуе газета «былога сябра» Пуціна. — Гэта была жорсткая і подлая школа — выжываў мацнейшы. Гэта дало яму сілы паверыць у тое, што ўсё магчыма».

Усё больш узмацняючы ўражанне, карэспандэнт Daily Mirror піша пра тое, як Пуціну даводзілася біцца са шпаной. Ды і сам ён быў такой жа шпаной, заўважае ён. А ў камунальнай кватэры, акрамя людзей, было яшчэ шмат пацукоў. І ў абавязкі Валодзі, працягвае газета, уваходзіла забойства гэтых пацукоў.

Аднойчы яго ўкусіў пацук. І гэта стала яму ўрокам на ўсё жыццё. Былы сябар Пуціна ўсміхнуўся і сказаў: «Я не раз чуў потым, як ён казаў: ніколі не заганяй пацука ў кут».

Пуцін, мяркуючы па ўсім, ніколі не вяртаўся ў тое месца, дзе ў сапраўднай беднасці прайшло яго дзяцінства, піша Daily Mirror.

Цяпер ён лічыцца адным з найбагацейшых і самых уплывовых людзей у свеце, працягвае газета. А ў падлеткавым узросце Валодзя Пуцін быў членам дваровай банды, але пасля таго як верхавода банды пасадзілі, будучы прэзідэнт узяўся за розум і пачаў займацца спортам — спачатку боксам, потым дзюдо.

А ў 40 гадоў пасля працы ў рэзідэнтуры КДБ у Нямеччыне і пасля падзення Берлінскага мура Пуцін думаў, што яго кар'ера скончаная, і нават збіраўся стаць таксістам.

Але неўзабаве ён пасябраваў з высокапастаўленымі палітыкамі і стаў падымацца па службовай лесвіцы. «Выкарыстоўваючы сваю пацучыную хітрасць, праз 10 гадоў гэты чалавек стаў прэзідэнтам Расеі», — падсумоўвае свой расповед Daily Mirror.