Гідрамет: У пятніцу будзе да +23°С

Сіноптыкі абяцаюць моцныя дажджы і навальніцы ў найбліжэйшыя дні.

У Беларусь прыйшлі дажджы - у найбліжэйшыя два дні надвор'е не зменіцца. Пра гэта tut.by расказаў начальнік службы метэаралагічных прагнозаў Гідрамета Мінпрыроды Дзмітрый Рабаў.

«У найбліжэйшыя двое сутак аэрасінаптычная сітуацыя ў краіне не зменіцца. Халодная франтальная сістэма, затрымаўшыся ў паралельных плынях, будзе як «хваля», гэта значыць, дажджы не спыняцца», - адзначыў сіноптык.

28 красавіка, у пятніцу, уначы на паўднёва-ўсходняй палове, удзень на большай частцы тэрыторыі Беларусі працяглыя дажджы. Удзень у многіх раёнах - моцныя дажджы, у асобных раёнах на поўдні Беларусі - навальніцы. Тэмпература ўначы 0...+6°С, удзень +5...+11°С; на паўднёвым усходзе ўначы +7...+11°С, удзень +12...+17°С, у Гомельскай вобласці +18...+23°С.

29 красавіка, у суботу, на большай частцы тэрыторыі Беларусі таксама дажджы. Уначы і раніцай на паўночна-заходняй палове краіны працяглыя моцныя дажджы. У асобных раёнах навальніцы. Тэмпература ўначы +5...+11°С, удзень +10...+17°С; на ўсходзе ўначы +12...+14°С, удзень +18...+23°С.

І толькі ў нядзелю, 30 красавіка, атмасферны фронт будзе павольна сыходзіць на ўсход і надвор'е пачне паляпшацца: інтэнсіўнасць дажджоў паменшыцца, і яны будуць невялікімі і кароткачасовымі. Тэмпература ўначы +3...+10°С, удзень +10...+17°С; на ўсходзе ўначы +11...+12°С, удзень +18...+22°С.