Менгарвыканкам: Ахоўнік не мае права забараняць фатаграфаваць у краме або кавярні

Некаторыя менчукі траплялі ў сітуацыі, калі ахова забараняла ім фатаграфаваць у крамах і гандлёвых цэнтрах.

Па тлумачэнні пра законнасць такіх дзеянняў у Менгарвыканкам звярнуліся аўтары петыцыі на рэсурсе «Зручны горад». Нядаўна яны атрымалі афіцыйны адказ за подпісам намесніка старшыні выканкама Андрэя Дамарацкага. Згодна з ім, фатаграфаваць і здымаць відэа ў крамах і кавярнях можна без дазволу, піша tut.by.

«Можна ці нельга здымаць у краме? Ці могуць ужыць за здымку артыкул 17. КаАП (Хуліганства)? Каму можна верыць, каму не?» - задалі пытанне на сайце «Зручны горад» і накіравалі разгорнуты запыт у Менгарвыканкам.

Аўтары паведамлялі, што забарона на здымку часам абгрунтоўваецца работнікамі крамаў унутранымі загадамі кіраўніцтва, аўтарскімі правамі на афармленне вітрын ці абаронай інтарэсаў грамадзян.

У неабходны тэрмін ён атрымаў адказ за подпісам намесніка старшыні Менгарвыканкама Андрэя Дамарацкага, які курыруе ў тым ліку гандаль.

Са спасылкамі на заканадаўства ў адказе тлумачыцца, што інфармацыя, да якой кожны мае вольны доступ, не складае прадмету камерцыйнай таямніцы. Таму афармленне той жа вітрыны аднесці да такіх нельга.

Галоўная ж выснова ўсяго тэксту адказу Менгарвыканкама гучыць наступным чынам.

«Грамадзяне маюць права весці фота- і відэаздымкі ў агульнадаступных памяшканнях, у тым ліку ў крамах, гандлёвых цэнтрах, клубах, барах. Работнікі службы аховы не маюць права забараняць або прыпыняць працэс фота- і відэаздымкі. Знак на ўваходзе (закрэслены фотаапарат) не можа быць перашкодай для фотаздымкі», - гаворыцца ў лісце за подпісам Дамарацкага.

Выключэннем з гэтага правіла з'яўляюцца ігральныя ўстановы, дзе забаронена здымаць наведвальнікаў без іх згоды або без згоды ўпаўнаважанага службовай асобы або арганізатара азартных гульняў.