Як бунтары з Крычава «дыскрэдытавалі дзяржаўныя органы і іх кіраўнікоў»

У бунце міліцыянтаў з Крычаўскага РАУС улада больш за ўсё спалохалася агалоскі ў незалежных СМІ.

УУС Магілёўскага аблвыканкама скончыла службовую праверку паводле факта распаўсюджвання ў СМІ інфармацыі аб сітуацыі ў Крычаўскім РАУС. Паводле яе вынікаў падпалкоўнік міліцыі Ігар Вусік і лейтэнант Андрэй Шашкоў звольненыя з органаў.

Як паведамляе прэс-служба УУС, праверка ўстанавіла факты грубага і наўмыснага парушэння Вусікам і Шашковым «умоў заключаных з імі кантрактаў аб службе і патрабаванняў ведамаснага нарматыўнага акта аб узаемадзеянні АУС са СМІ».

На думку ведамства, Вусік і Шашкоў пэўна ведалі пра названыя умовы і патрабаванні, абавязковых для выканання кожным супрацоўнікам органаў унутраных спраў, а таксама аб адказнасці прадугледжанай, але свядома пайшлі на іх грубае парушэнне.

«Распаўсюджаная імі ў СМІ і сетцы Інтэрнэт суб'ектыўная, неправераная ва ўстаноўленым парадку інфармацыю аб дзейнасці кіраўніцтва Крычаўскага РАУС выклікала негатыўны грамадскі рэзананс і дыскрэдытавала дзяржаўныя органы і іх кіраўнікоў», — гаворыцца ў паведамленні.

Сваімі дзеяннямі, паказваюць у ведамстве, падпалкоўнік міліцыі Вусік і лейтэнант міліцыі Шашкоў «учынілі ўчынкі, несумяшчальныя са знаходжаннем на службе ў органах унутраных спраў Рэспублікі Беларусь, што ў адпаведнасці з кантрактам аб службе з'яўляецца падставай для яго датэрміновага скасавання».

«Паводле вынікаў службовай праверкі Вусік І. В. і Шашкоў А. А звольненыя з органаў унутраных спраў паводле адмоўных матываў. Абодва супрацоўніка азнаёмленыя з высновамі службовай праверкі ва ўстаноўленым парадку», — інфармуе УУС Магілёўскага аблвыканкама.

Нагадаем, супрацоўнікі Крычаўскага РАУС калектыўна звярнуліся з лістом да міністра ўнутраных спраў, у якім заявілі, што іх правы парушаюцца. Міліцыянты папрасілі правесці праверку ў дачыненні да кіраўніцтва РАУС «у сувязі са шматлікімі злоўжываннямі».

Міністр унутраных спраў Беларусі Ігар Шуневіч заявіў, што службовая праверка па сітуацыі ў Крычаўскім РАУС завершана. Паводле яе вынікаў былі выяўлены «парушэнні дысцыпліны і ведамасных нарматыўных актаў як з боку кіраўніка райаддзела, так і з боку скаржніка». У выніку абодвух прыцягнулі да дысцыплінарнай адказнасці. Акрамя таго, прызначаная яшчэ адна службовая праверка паводле факта распаўсюду інфармацыі ў СМІ «з парушэннямі патрабаванняў унутраных нарматыўна-прававых актаў МУС».

Падпалкоўніка Ігара Вусіка адхілілі ад выканання службовых абавязкаў на час правядзення праверкі і выключылі з ліку ўдзельнікаў афіцэрскага сходу.

У красавіку «за грубае парушэнне службовай дысцыпліны» з Крычаўскага РАУС звольнілі аднаго з падпісантаў пад калектыўным зваротам да міністра — маёра Юрыя Дзюбанава. У пачатку траўня — участковага інспектара Андрэя Шашкова.