Услед за прэзідэнтам у Менск прыехаў міністр абароны Сербіі
1- 20.05.2017, 11:37
- 11,236
У Менск з візітам прыбыў міністр абароны Сербіі Зоран Джорджавіч.
Пра гэта паведамілі ў Міністэрстве абароны Беларусі ў суботу.
«З 19 да 21 траўня праходзіць афіцыйны візіт у Рэспубліку Беларусь міністра абароны Рэспублікі Сербія Зорана Джорджавіча», – гаворыцца ў паведамленні на сайце Мінабароны.
Паводле інфармацыі ваеннай установы ў суботу адбылася сустрэча Джорджавіча з міністрам абароны Беларусі генерал-лейтэнантам Андрэем Раўковым.
«Падчас наведвання 8-й Міжнароднай выставы ўзбраення і ваеннай тэхнікі “MILEX-2017” запланаваная сустрэча кіраўніка сербскай дэлегацыі з кіраўніком Дзяржаўнага ваенна-прамысловага камітэта Рэспублікі Беларусь Сяргеем Гурулёвым», – адзначылі ў Мінабароны.
«Правядзенне перамоваў з сербскім бокам дазволіць прадоўжыць развіццё ўзаемавыгадных двухбаковых адносінаў і абмеркаваць перспектыўныя напрамкі ваеннага і ваенна-тэхнічнага супрацоўніцтва», – прадоўжылі ў ваеннай установе.
Акрамя гэтага, кіраўнік сербскай абароннай установы наведае Храм-помнік у гонар Усіх святых і ў памяць ахвяраў, якія выратаванню Айчыны нашай паслужылі.
«Падчас наведвання Зоран Джорджавіч перадасць капсулу з зямлёй Мемарыяльнага комплексу вызвольнікаў Белграда для захавання ў крыпце храма», – падсумавалі ў Мінабароны.