Дадон рады прыпыненню фінансавай дапамогі Еўразвяза Малдове
7- 20.05.2017, 14:53
- 9,996
Прэзідэнт Малдовы хоча правесці датэрміновыя парламенцкія выбары.
Прэзідэнт Малдовы Ігар Дадон заявіў у інтэрв'ю радыёстанцыі Europa Libera, што вітае пастанову Еўрапейскага звяза ад 16 траўня пра перанос галасавання ў пытанні вылучэння фінансавай дапамогі Кішынёву памерам € 100 мільёнаў, піша Гордон.
«Калі адтэрміноўка фінансавання павернецца праблемамі для ўрада і прывядзе да датэрміновых выбараў, мы гэта будзем вітаць. Я – за датэрміновыя парламенцкія выбары. Я казаў пра гэта даволі часта, на самым высокім узроўні ў ЕЗ, на ўзроўні першых асоб: “Калі вы не падтрымліваеце гэтую ўладу – выдатна, не падтрымлівайце яе. Падтрымайце рэформы, а не ўрад”», – сказаў Дадон.
Ён абвінаваціў еўрапейскія структуры ў фінансавай падтрымцы «карупцыянераў» з кабінета міністраў Малдовы.
«Памылка – у пазіцыі Захаду. Чаму яны даюць далучаць сябе ў гэтую геапалітычную гульню, якую не я пачынаў? Яны фінансавалі гэтыя ўрада цягам апошніх сямі гадоў, таму што баяліся расейскіх танкаў. Калі Філат (былы прэм'ер-міністр Малдовы Улад Філат. – “Гордан”) краў мільярды, калі дэмакраты стваралі гэты карумпаваны ўрад, яны закрывалі вочы і казалі: “Дамо ім яшчэ грошай”. І гэтак далей, і да сёння», – заявіў прэзідэнт.
Ён таксама незадаволены тым, што ЕЗ ставіць умовай прадаўжэння фінансавання змяненне сістэмы выбараў у Малдове.
13 лістапада 2016 года Дадон перамог на прэзідэнцкіх выбарах Малдовы. У снежні ён прынёс прысягу прэзідэнта.
Ён неаднаразова крытыкаваў асацыяцыю Малдовы з Еўразвязам і выступаў за стратэгічнае партнёрства з Расеяй. У ходзе выбарчай кампаніі ён таксама казаў, што Крым належыць Расеі.
У Малдове пасада прэзідэнта пераважна цырыманіяльная, вонкавая палітыка з'яўляецца прэрагатывай урада.