Рагозін заявіў пра стварэнне ў Расеі інтэлектуальнай зброі
28- 20.05.2017, 15:13
- 16,004
Да 2025 года ў РФ з'явіцца інтэлектуальная зброя, будуць закончаныя распрацоўкі новых робатаў.
Да гэтага моманту павінна адбыцца абнаўленне касмічнай групоўкі, заявіў віцэ-прэм'ер Расеі Дзмітрый Рагозін у праграме «Весці ў суботу» на тэлеканале «Расея 1», паведамляе РБК.
Гэтыя планы ўваходзяць у дзяржаўную праграму ўзбраення. Рагозін назваў яе інавацыйнай і растлумачыў, што яна ўключае ў сябе новыя падыходы
«Перш за ўсё, гэта стварэнне інтэлектуальнай зброі, аўтаматычнай сістэмы сувязі і выведкі. З'явіцца ў нас сучасная сувязь у войсках», – сказаў віцэ-прэм'ер (цытаты паводле «РІА Навіны»).
Ён сказаў, што ў Расеі заканчваецца распрацоўка новых беспілотных наземных і паветраных машынаў, абнаўляецца касмічнае ўзбраенне.
Пры гэтым віцэ-прэм'ер запэўніў, што «Расея – краіна, безумоўна, абсалютна мірная». Аднак ён удакладніў, што прыярытэт для ўладаў – захаваць бяспеку межаў і хаўруснікаў, і для гэтага існуе сістэма ўзбраенняў, якая «здольная адказаць любому непрыяцелю».
«Таму будзем адлюстроўваць любыя агрэсіі патэнцыйных праціўнікаў не вялікім лікам, а вялікім уменнем і мабільнасцю нашых узброеных сілаў», – сказаў Дзмітрый Рагозін.