Гулец «Нафтана»: Грошы мы цяпер не бярэм наогул

Паўабаронца наваполацкага «Нафтана» Аляксей Сучкоў распавёў аб фінансавай сітуацыі ў клубе.

- У чым бачыце прычыну такога невыразнага старту «Нафтана» ў гэтым сэзоне?

- Пачыналі чэмпіянат з адзнакі мінус 5 балаў - гэта каманду трохі пахіснула. Калі б не гэты мінус, то цяпер бы мелі ўжо 4 балы, і ўсё не здавалася б такім змрочным. Яшчэ ў дадатак новая каманда і новыя людзі. Так пакрысе ўсё і прыйшло да цяперашняй сітуацыі.

Я ўжо чацвёрты сэзон у Наваполацку, і год за годам становіцца толькі горш. Не ад добрага жыцця цяпер даводзіцца змагацца за выжыванне. Калі ўзяць гэты год, то 85-90 працэнтаў складу памянялася. Трэба ж нейкі час, каб хлопцы згуляліся. Але сапраўды сумная сітуацыя толькі ў фінансавым плане, а ў гульнявым не ўсё так дрэнна, як можа здацца на першы погляд. Добра, што здолелі ўзяць першыя пераможныя балы, будзем спадзявацца, што ў нас выйдзе набіраць балы і далей, - распавёў football.by Аляксей Сучкоў.

- Ці ёсць станоўчая дынаміка ў плане фінансаў?

- Магу сказаць, што сітуацыя толькі пагоршылася: грошы мы цяпер не бярэм наогул - чакаем, калі надыдуць лепшыя часы. Не ведаю, ці звязана гэта з эканомікай або чымсьці яшчэ. Мы стараемся рабіць сваю працу - выходзіць гуляць на максімуме магчымасцяў, а праблемы фінансаў павінны развязваць іншыя людзі.

- Раз ужо так усё дрэнна, то што вас трымае ў «Нафтане»?

- Цяжка адказаць. Напэўна, таму што мая сям'я жыве тут, у Наваполацку.

- Як ставіцца сям'я да таго, што Вы цяпер без заплаты?

- Натуральна, гэтаму ніхто не рады. Сям'я ж не толькі ў мяне. Акрамя футбалістаў ёсць яшчэ трэнеры, работнікі клуба. Вядома, усё незадаволеныя. Зноў жа, паўтаруся, што чакаем, калі сітуацыя палепшыцца. Пакуль гуляем да канца першага кола, а потым будзе відаць.

- Адкуль бераце грошы, каб утрымліваць сям'ю?

- Футбалісты «Нафтана» цяпер выкручваюцца, хто як можа. Хтосьці бярэ крэдыты, нехта ў некага пазычае. Так і жывем.

- Ці можа «Нафтан» паўтарыць лёс бабруйскай «Белшыны», якая таксама сутыкнулася з сур'ёзнымі фінансавымі праблемамі і ў выніку вылецела ў першую лігу?

- У той жа «Белшыны», думаю, не такая цяжкая сітуацыя як у нас цяпер, нягледзячы на тое, што яны выступаюць у турніры рангам ніжэй. Там сілай, што разбурыла «Белшыну», з'яўляліся не фінансавыя праблемы, а нейкія незразумелыя людзі, якія прыйшлі ў клуб і задурылі нам галовы. Пра наш лёс сказаць цяжка. Вельмі шкада, што каманда, якая здабыла два Кубкі краіны, апынулася ў такім становішчы. Крыўдна будзе, калі адбудзецца тое, да чаго ўсё ідзе.

- Нешта станоўчае можаце знайсці?

- Тое, што мы маем магчымасць выходзіць на поле і гуляць. Сказаць, што мы моцна падупалі духам як футбалісты, таксама не магу. Цяпер у суполцы шмат моладзі, яны імкнуцца сябе паказаць з найлепшага боку, каб сысці ў нейкі іншы клуб. Як кажа Алег Анатольевіч (Сідарэнка - заўвага), такая сітуацыя павінна загартаваць наш дух. Усе гэтыя праблемы - школа жыцця.