Як адзначалі выпускны ў польскай школе ў Гародні, якая змагаецца супраць русіфікацыі

Выпускны пачаўся з імшы ў касцёле, затым выпускнікі танцавалі паланез.

Гарадзенская школа №36 адрозніваецца ад іншых тым, што навучанне тут ідзе на польскай мове, хоць школьную праграму дзеці вывучаюць беларускую. А яшчэ тут ёсць свае традыцыі, якія склаліся за 20 гадоў працы. Tut.by пабываў на выпускным балі ў незвычайнай школе.

Нагадаем, што гарадзенская школа №36 сутыкнулася са спробамі ўладаў перавесці польскамоўную школу на расейскую мову навучання.

Выпускны пачынаецца з супольнай урачыстай імшы ў касцёле, які размешчаны побач са школай. І ўжо адтуль выпускнікі, прыгожыя ды ўбраныя, прыходзяць у сваю альма-матэр.

Выпускны - гэта заўсёды кранальна і ўрачыста. У доўгіх школьных калідорах мітусня. Ідзе апошняя падрыхтоўка перад канцэртам. Усё, як і ў іншых школах, толькі ў размовах сустракаюцца польскія, расейскія і беларускія словы. Гэта нікога не здзіўляе. Дзеці тут з першага класа вывучаюць польскую мову. Урокі матэматыкі ў першакласнікаў таксама праходзяць на гэтай мове, а далей на ёй выкладаюць і іншыя прадметы - фізіку, хімію, біялогію.

Пры гэтым тут абавязковае вывучэнне дзяржаўных моў. У раскладзе ёсць і расейская, і беларуская. Напрыклад, гісторыю Беларусі, раздзел «Мая Радзiма - Беларусь» прадмет «Чалавек і свет» у 4 класе школьнікі праходзяць на беларускай мове, раздзел «Геаграфія Беларусі» ў 10 класе - на расейскай.

Выпускны ў гэтай школе называецца bal pomaturalny. Matura (Матуру) - экзамены. Гэта значыць баль пасля экзаменаў. Ёсць у школе і іншая, тыпова польская (і чэшская) традыцыя - праводзіць стодзёнку (Studniówka, Bal Studniówkowy). Гэта яшчэ адзін выпускны баль (przedmaturalny), які праходзіць прыкладна за сто дзён да пачатку экзаменаў, звычайна ў студзені або лютым. Але ён ужо ў мінулым.

У гэтым годзе ў школе 24 выпускнікі. Да канцэрту 11 «А» падрыхтаваўся грунтоўна: развучылі сцэнкі, песні, танцы, доўга рэпетавалі і запаміналі патрэбныя па. Выпускнікі правяраюць дэкарацыі, абмяркоўваюць дэталі. Сярод гасцей - віцэ-консул Рэспублікі Польшча ў Гародні Якуб Бляткевіч і прадстаўнік Звязу палякаў у Беларусі Казімір Знайдзінскі.

Традыцыйна канцэрт пачынаецца з паланэза. Танчаць не толькі выпускнікі, але і настаўнікі. Дзеці, выходзячы на сцэну, вачыма шукаюць блізкіх, збянтэжана ўсміхаюцца, але спіны трымаюць роўна і стараюцца не ўдаваць, што надзвычай хвалююцца.

Акрамя простага ўручэння атэстатаў сталасці, выпускнікам, а тут іх называюць absolwenci, уручаюць адмысловыя ўзнагароды «Залаты глобус». Намінацый мноства - ад «Выкрадальнікаў жаночых сэрцаў» да «Прыгажуні-пявунні».

Уся праграма канцэрту - пераважна на польскай мове, але настаўнікі віншуюць выпускнікоў і на расейскай, і на беларускай, нязменна пачынаючы сваю прамову так: «Kochani absolwenci...»

Сярод выпускнікоў школы - беларускі музыка Пятро Клюеў, баскетбаліст «Гародні 93» Павел Карасевіч, святар Ежы Марціновіч, шматразовая чэмпіёнка Беларусі і Еўропы ў таэквандо, трэнерка Мілена Кудрыцка.

Дырэктар кажа, што ў школе імкнуцца прывіваць павагу і да беларускай, і да польскай культуры.

Самі медалісты сціпла стаяць убаку. Аніта, Антон і Валерый дзеляцца сваімі планамі: стаць прафесіяналамі, дамагчыся поспеху. Хлопцы хочуць быць праграмістамі, дзяўчына - лагістам. Звычайна дзеці з гэтай школы выбіраюць як беларускія, так і польскія ВНУ.

Сённяшнія выпускнікі кажуць, што польская мова - гэта добрая дапамога ў жыцці, і паколькі многія з этнічна польскіх сем'яў, то навучанне ў гэтай школе дазваляе падтрымліваць сувязь са сваёй малой радзімай.

11 «А» - клас дружны. Відаць, як кранальна яны падтрымліваюць адзін аднаго падчас выступаў, як абдымаюцца пасля канцэрту і яшчэ доўга не могуць адпусціць адзін аднаго. А потым усе разам, пераскокваючы праз прыступкі на лесвіцы, нясуцца на дыскатэку, выходзяць у двор, праводзячы бацькоў, а праз некалькі гадзін ідуць сустракаць свой першы дарослы світанак.