ЗША абвясцілі газавую рэвалюцыю

Амерыка выходзіць на глабальны энэргетычны рынак як найбуйнейшы экспарцёр звадкаванага газу.

Злучаныя Штаты маюць намер да 2020 года выйсці на глабальны рынак звадкаванага прыроднага газу (ЗПГ) у якасці нета-экспарцёра.

Пра гэта гаворыцца на сайце Белага дома. Продаж амерыканскага газу з 2016 да 2040 год можа павялічыць даходы федэральнага бюджэту на 118 мільярдаў даляраў.

«Газавая рэвалюцыя ў ЗША прывядзе да таго, што наша краіна стане глабальным гульцом як экспарцёр ЗПГ», - адзначаецца ў паведамленні.

Да цяперашняга часу пачынаючы з 1953 года ЗША з'яўляюцца чыстым імпарцёрам прыроднага газу.

Прэзідэнт ЗША Дональд Трамп 28 красавіка адмяніў указ свайго папярэдніка Барака Абамы аб абмежаванні вытворчасці карысных выкапняў на шэльфе, пашырыўшы здабычу нафты і газу на ўчастках Атлантычнага, Ціхага і Паўночнага Ледавітага акіянаў і ў Мексіканскім заліве. Дакумент дазваляе весці здабычу на амаль сямі мільёнах квадратных кіламетраў. На гэтай тэрыторыі можа знаходзіцца да 90 мільярдаў барэляў нафты і да 9 трыльёнаў кубаметраў газу.