Фота з Лукашэнкам, якое праз два гады выклікае толькі пагардлівую ўсмешку

«Стальная апора» на справе выявілася прагнілым падмуркам.

У верасні 2015 года, незадоўга да прэзідэнцкіх «выбараў», Аляксандр Лукашэнка наведаў Беларускі металургічны завод. Там ён узяў удзел у запуску новай вытворчай лініі - драбнасортнага-драцянога стана. Падчас мерапрыемства быў зроблены гэты нясціплы здымак. Можна было зрабіць выснову, што апорай краіны з'яўляецца не толькі БМЗ, але і кіраўнікі дзяржавы, піша «Салідарнасць».

Паводле вынікаў таго года БМЗ узначаліў спіс самых стратных ААТ краіны. Аднак было вядома, што на прадпрыемстве праведзена дарагая мадэрнізацыя і мелася на ўвазе, што завод хутка пачне прыносіць вялікі прыбытак. Не проста ж так першыя асобы дзяржавы вылучалі яму грошы.

У лютым 2016 года Аляксандр Лукашэнка падпісаў указ №75 аб выдаванні БМЗ дзяржаўнай падтрымкі ў выглядзе выпуску валютных аблігацый на 240 млн даляраў, каб разлічыцца з банкамі па крэдытах.

Увесну 2016 году Андрэй Кабякоў заявіў, што «БМЗ выйдзе з няпростай сітуацыі больш моцным» і «стане адным з флагманаў беларускай прамысловасці».

Праз некалькі месяцаў у «Белэнэрга» паведамілі, што БМЗ ператварылася ў самае буйное прадпрыемства-неплацельшчыка.

Надзея не знікала, здавалася, прадпрыемства вось-вось пачне аддаваць запазычанасці краіне. Але ў красавіку 2017 года Аляксандр Лукашэнка зноў падпісаў указ аб выдзяленні заводу грошай - амаль 30 млн рублёў для забеспячэння фінансава-эканамічнай устойлівасці. Паведамлялася, што сродкі пойдуць на пакрыццё расходаў, звязаных з фінансаваннем інвестпраекта «Арганізацыя вытворчасці сартавога пракату з будаўніцтвам драбнасортнага-драцянога стана». Таго самага, які ўрачыста запусціў кіраўнік дзяржавы ў 2015-м.

І вось свежая навіна. 30 траўня Савет міністраў даручыў Мінфіну падрыхтаваць праект пастановы аб кампенсацыі БМЗ, што мае фінансавыя складанасці, працэнтаў за карыстанне банкаўскімі крэдытамі. А Мінэнерга і іншыя дзяржаўныя органы павінны падрыхтаваць праект указа аб выдаванні БМЗ растэрміноўкі выплаты запазычанасці за энэргарэсурсы.

Глядзіш цяпер на фотаздымак двухгадовай даўніны і здзіўляешся: «сталёвая апора» на справе выявілася прагнілым падмуркам.