Лукашэнка падмяў пад сябе рыбалоўныя ўгоддзі

Цяпер толькі дыктатар можа здаваць у арэнду адцінкі рэк.

У Беларусі зробленыя захады для «рацыянальнага выкарыстання» рыбалоўных угоддзяў. Адпаведны Указ №247 Лукашэнка падпісаў 11 ліпеня, паведамляе прэс-служба правадыра.

Дакумент устанаўлівае парадак перадачы ў арэнду рыбалоўных угоддзяў - азёр, натуральных вадаёмаў і зямельных надзелаў на ўзгадненне з кіраўніком Беларусі.

Акрамя таго, укараняецца комплексная схема размяшчэння паверхневых водных аб'ектаў - сажалак і абваднення кар'ераў, прыдатных для вядзення рыбаводства, на падставе якой мясцовыя Саветы дэпутатаў будуць перадаваць іх у арэнду.

«Указ дазволіць рацыянальна выкарыстоўваць рыбалоўныя ўгоддзі і зямельныя надзелы, неабходныя для вядзення рыбалоўнай гаспадаркі, а таксама павысіць эфектыўнасць выкарыстання сажалак і абваднення кар'ераў», - гаворыцца ў абгрунтаванні да ўказа.

У прэс-службе таксама адзначылі, што для таго, каб беларусы маглі і далей «рэалізоўваць сваё права на бясплатнае аматарскае рыбалоўства», дакументам прадугледжваецца не перадаваць у арэнду адцінкі вадацёкаў - рэкі, ручаіны, каналы.