Першы намеснік кіраўніка «Беларусбанка» прызнаўся ў атрыманні хабараў на $ 200 тысячаў

Сёння пачаўся суд над топ-мэнэджарам і адным з старажылаў «Беларусбанка».

Першы намеснік кіраўніка Генадзь Гаспадарык быў затрыманы ў сярэдзіне чэрвеня летась. Каментаваў затрыманне прэс-сакратар КДБ: «Затрыманы з доказамі злачынства пры атрыманні хабару». Цяпер яму пагражае да 15 гадоў пазбаўлення волі, піша onliner.by.

У дачыненні да Генадзя Гаспадарыка была распачатая крымінальная справа паводле ч. 2 і 3 арт. 430 КК Беларусі (Атрыманне хабару) і ч. 2 і 3 арт. 424 (Злоўжыванне ўладай або службовымі паўнамоцтваў). Але сума і абставіны хабару ў многіх выклікалі сумнеў. Нездарма ў «Беларусбанку» надзвычайнае здарэнне каментавалі лаканічна, але паслядоўна: «Генадзь Гаспадарык – добры чалавек». Дык вось згодна з версіяй абвінавачвання банкір быў затрыманы ў сваім кабінеце пры атрыманні 14 тысячаў даляраў.

У рамках справы ў жніўні летась быў затрыманы Мікалай Цырто, намеснік дырэктара дэпартамента ў працы з каштоўнасцямі «Беларусбанка». Ён таксама на лаве і абвінавачваецца ў злоўжыванні ўладай, атрыманні і даванні хабару.

Абарона абвінавачаных хадайнічае пра суд у закрытым рэжыме, паколькі ў працэсе будуць закранутыя камерцыйныя сакрэты банка. Але суддзя адхіліў хадайніцтва.

– Генадзь Гаспадарык, з'яўляючыся службовай асобай, займаючы адказную пасаду, уступіў у злачынную змову з прадстаўнікамі камерцыйных структураў, – зачытвае прамову дзяржабвінаваўца Юрый Шарстнёў.

У абвінавачванні фігуруюць 6 эпізодаў атрымання хабару.

– Так, у перыяд з канца 2009-га да пачатку 2010-га (дакладней час не вызначаны), знаходзячыся ў рэстаране «Чумацкі шлях», Гаспадарык прыняў $ 4 тысячы даляраў у прадпрымальніка Бучнева, – прадаўжае дзяржабвінаваўца. – За садзейнічанне ў будучыні падкантрольным Бучневу кампаніям і заключэнне дамоваў пастаўкі з ягонымі камерцыйнымі структурамі.

Прыкладна праз год у гэтым жа рэстаране банкір прыняў ад таго ж бізнэсмэна яшчэ 3 тысячы еўраў. На гэты раз, паводле інфармацыі абвінавачвання, за перамогу ў конкурсе на закупку табло курсаў валютаў, вакуумных пакавальнікаў і іншай тэхнікі для банкаўскай дзейнасці.

– Ён жа ў красавіку і траўні 2013-га ў аўтамабілі Бучнева прыняў яшчэ $ 70 тысячаў даляраў – асабліва буйны памер, – прадаўжае пракурор. – За спрыянне ў перамозе падкантрольнай камерцыйнай структуры ў конкурсе на закупку сродкаў аўтаматызацыі для патрэбаў банка – 234 гатункавальнікі банкнотаў. Склалі тэхзаданне так, каб перамагла структура Бучнева.

Ён ж 25 красавіка 2014 года ў машыне Бучнева паўторна прыняў $ 90 тысячаў. На гэты раз справа тычылася закупкі больш як 200 гатункавальнікаў купюраў у «Смарт Бізнэс Тэхноладжы».

Апошні раз Юрый Шарстнёў успомніў Бучнева ў эпізодзе 31 снежня 2014 года, калі ён перадаў абвінавачанаму $ 2 тысячы.

Два заключныя эпізоды, паведамляе абвінаваўца, адбыліся ўжо ў службовым кабінеце Генадзя Гаспадарыка:

Там восенню 2015 года і 15 чэрвеня 2016-га (перад затрыманнем. – Заўвага.) у службовым кабінеце прыняў ад Мікалая Цырто 32 тысячы і 14 тысячаў даляраў адпаведна. За спрыянне камерцыйнай кампаніі ў перамозе ў конкурсах для патрэбаў «Беларусбанка».

Яшчэ больш грошай, паводле словаў Юрыя Шарстнёва, прайшло праз Мікалая Цырто. Той з 2011 года займаў у «Беларусбанку» пасаду, звязаную з закупкамі сродкаў аўтаматызацыі для патрэбаў банка.

Дык вось з канца 2012 года ён атрымаў ад таго ж прадпрымальніка Бучнева больш за $ 600 тысячаў. Сюды ўваходзяць сумы ($ 50 тысячаў і $ 70 тысячаў), якія згадваюцца ў кантэксце схілення да злачынства, то-бок Цырто, як мяркуе абвінаваўца, пераконваў бізнэсмэна ў мэтазгоднасці давання хабару.

Пасля гэтай прамовы Генадзь Гаспадарык прызнаў віну ва ўсіх эпізодах, звязаных з атрыманнем хабару. Такім чынам прызнаўшы абвінавачанне паводле дзвюх частак 430-га артыкула КК. Пры гэтым адхіліў абвінавачванні ў злоўжыванні службовымі паўнамоцтвамі.

Мікалай Цырто быў менш ясны і папрасіў права выказацца ў пытаннях прызнання або непрызнання ў ходзе далейшага допыту.

Суд абвесціў перапынак да заўтра.

Генадзь Сяргеевіч Гаспадарык нарадзіўся ў 1960 годзе ў в. Нялепава Нясвіжскага раёна Менскай вобласці. Скончыў Брэсцкі інжынерна-будаўнічы інстытут (1981), Беларускі дзяржаўны эканамічны ўніверсітэт (1994).

Працоўны шлях пачынаў у 1981 годзе майстрам Першамайскай ПМК-13 аб'яднання «Смаленскмеліярацыя».

У банкаўскую сістэму прыйшоў пасля службы ў шэрагах Савецкай арміі. З 1983 да 1987 года працаваў інжынерам у Кастрычніцкім і Савецкім аддзяленнях, кіраўніком аддзела Менскай гарадской управы Будбанка СССР.

У 1988–1991 гадах – намеснік кіраўніка ўправы, галоўны інжынер управы інжынерна-тэхнічнага кантролю Беларускага рэспубліканскага банка Жылсацбанка СССР.

З 1991 да 1994 года працаваў намеснікам кіраўніка аддзела, які кіраваў Траецкім аддзяленнем Галоўнай управы Нацыянальнага банка БССР г. Менска.

У 1994–1997 гадах – кіраўнік управы АКБ «Белжелдорбанк», кіраўнік галіновага кіравання «Белжелдор АСБ “Беларусбанк”». У 1997-м прызначаны кіраўніком Менскай гарадской управы, а з 2002-га – намеснікам кіраўніка ўправы ААБ «Беларусбанк».

Першым намеснікам кіраўніка ўправы ААТ «АСБ “Беларусбанк”» Генадзь Гаспадарык быў прызначаны 1 лютага 2012 года.

Узнагароджаны медалём «За працоўныя заслугі».