Нізкія заробкі сталі галоўнай праблемай расейцаў

Заробкі і ўзровень жыцця займаюць першае месца ў спісе праблемных тэм для расейцаў ужо трэці месяц запар.

Амаль чвэрць (24%) расейцаў уважаюць за галоўную праблему ў краіне нізкі ўзровень жыцця і нізкія заробкі, паказала ліпеньскае апытанне Усерасейскага цэнтра вывучэння грамадскай думкі (УЦДГМ), паведамляе расейская служба BBC.

Нізкія заробкі і ўзровень жыцця займаюць першае месца ў спісе праблемных тэм для расейцаў ужо трэці месяц запар, адзначаюць сацыёлагі. У параўнанні з ліпенем 2016 года колькасць расейцаў, якія турбуюцца праз нізкія заробкі, вырасла на 10%.

Цягам пяці месяцаў (з лютага да чэрвеня 2017 году) гэты паказчык дэманстраваў бесперапынны рост і павялічыўся больш чым удвая - з 13% да 27%.

На сёння расейцаў таксама турбуюць эканамічны крызіс і эканамічная палітыка (21%), сацыяльная палітыка (18%), праблемы аховы здароўя (17%), беспрацоўе (14%), праблемы ў сферы адукацыі (12%), нізкія пенсіі і пенсійная рэформа (12%), інфляцыя і рост коштаў (10%), карупцыя (10%) і стан ЖКГ (8%).

Як адзначаецца ў даследаванні, актуальнасць гэтых тэм праблемнага рэйтынгу (за выключэннем інфляцыі) сёння вышэйшая, чым годам раней.

«Нягледзячы на сканчэнне крызісу, праблемы матэрыяльнага характару сёння хвалююць расейцаў нават больш, чым год таму», - канстатуюць сацыёлагі.

А вось праблемы замежнай і ўнутранай палітыкі і палітычнае становішча ў топ-10 найбольш важных для краіны праблем паводле вынікаў апытання не ўвайшлі.

Для параўнання: у сакавіку 2015 года замежная палітыка хвалявала 13% удзельнікаў апытання УЦВГД і займала трэці радок у спісе праблемных тэм (у той час як нізкі ўзровень жыцця турбаваў ўсяго 11% рэспандэнтаў). Праз год аб праблемах замежнай палітыкі заяўлялі ўжо 6% апытаных (7-е месца ў рэйтынгу), а ў снежні 2016 го - 4% (11-е месца).

«На сёння найбольш вострая тэма - праблема матэрыяльнага дабрабыту, нізкія заробкі і нізкі ўзровень жыцця, што актуалізуе другую хворую тэму - сацыяльнай падтрымкі», - прыводзяцца ў паведамленні цэнтра словы кіраўніцы практыкі сацыяльнага мадэлявання і прагназавання Дэпартамента даследаванняў УЦДГМ Юліі Баскакавай.

Апытанне праводзілася з 27 ліпеня да 1 жніўня 2017 года ў 130 населеных пунктах у 46 абласцях, краях і рэспубліках васьмі федэральных акруг Расеі шляхам інтэрв'ю па месцы жыхарства рэспандэнта. У апытанні ўзялі ўдзел 1600 чалавек. На адкрытае пытанне «якія праблемы вы ўважаеце за найбольш важныя для краіны агулам?» можна было даць не больш за пяць варыянтаў адказу.