Віцэ-прэм'ер Жарко нечакана прапанаваў вярнуцца да 5-бальнай сістэмы

Лукашэнка пагадзіўся абмеркаваць гэтае пытанне.

Вяртанне да пяцібальнай сістэмы ацэнкі ведаў прапануецца абмеркаваць у Беларусі. Пра гэта заявіў журналістам віцэ-прэм'ер Васіль Жарко пасля рабочай сустрэчы з Лукашэнкам, паведамляе БЕЛТА.

«Дзесяць гадоў як у краіне ўведзеная дзесяцібальная сістэма навучання. Шмат пытанняў з’яўляецца наконт дзесяцібальнай сістэмы. Гэта і часам бывае суб'ектывізм у ацэнцы. І ў нас няма нездавальняючай ацэнкі. Таму што адзін бал - гэта таксама ацэнка ведаў. Раней (пры пяцібальнай сістэме. - заўв. БЕЛТА) разумелі - адзінка, двойка - гэта нездавальняючыя адзнакі. Таму трэба вынесці на абмеркаванне грамадскасці. Можа быць, і вярнуцца да пяцібальнай сістэмы», - сказаў віцэ-прэм'ер.

«Каб кожны разумеў: чатыры, значыць, чатыры. Пяць, значыць - выдатнік. Няма суб'ектывізму, - прывёў прыклад Васіль Жарко. - Што такое 4 з мінусам, 4 і 4 з плюсам (па старой сістэме) - 6, 7, 8. дзе грань паміж шасцёркай і сямёркай, сямёркай і васьмёркай?»

Віцэ-прэм'ер адзначыў, што для пераводу на бюджэтную форму навучання акрамя ўдзелу ў грамадскім жыцці і іншых крытэрыяў патрэбныя ацэнкі як мінімум 7 балаў. «Адзін выкладчык паставіў 6, іншы паставіў 7. Але і там чатыры, і там чатыры (па пяцібальнай сістэме)», - дадаў ён.

Аляксандр Лукашэнка, выслухаўшы прапанову, падкрэсліў, што гэтае пытанне, перш чым прымаць якую-небудзь пастанову, неабходна вельмі добра абмеркаваць.