У Менску расце прапраўнучка Якуба Коласа і Янкі Маўра

Толькі адну нованароджаную ў Менску назвалі Наталляй, як высветлілася - у гонар дачкі першага беларускага фантаста.

Пасля публікацыі пра тое, якімі імёнамі беларусы цяпер называюць сваіх дзяцей, з kp.by звязалася жыхарка сталіцы Марыя Міцкевіч. У нататцы паведамлялася, што з пачатку года толькі адну дзяўчынку ў Менску назвалі Наталляй. Нованароджаная з рэдкім імем аказалася ўнучкай Марыі. Яна распавяла, што маленькая Наташа - зусім не простая дзяўчынка, а... прапраўнучка знакамітых беларускіх пісьменнікаў Якуба Коласа і Янкі Маўра! І Наталляй яе назвалі нездарма, а ў гонар прабабулі, дачкі першага беларускага фантаста.

Дзве сям'і пісьменнікаў парадніліся, калі малодшы сын Якуба Коласа, Міхась, ажаніўся на малодшай дачцэ Янкі Маўра, Наталлі. Міхась - доктар тэхнічных навук, працаваў у Акадэміі навук, доўгі час быў навуковым кансультантам музея Якуба Коласа. А Наталля была кандыдатам тэхнічных навук, выкладала ў Політэхнічным інстытуце. Дачка сужонкаў, Марыя, якая і напісала ў рэдакцыю, працавала выкладчыцай вышэйшай матэматыкі ў Інстытуце кіравання і прадпрымальніцтва.

- Так атрымалася, што мой дзед з боку бацькі - Якуб Колас (Канстанцін Міцкевіч). Мой бацька - яго малодшы сын Міхась, аб якім пясняр напісаў паэму «Міхасёвы прыгоды». Мая маці Наталля, у гонар якой назвалі ўнучку, - дачка Янкі Маўра. Пра іх знаёмства мой бацька пісаў у кнізе "Пад бацькоўскім дахам», - распавядае Марыя Міцкевіч. - Бацьку цяпер 91 год, але ён яшчэ ўдзельнічае ў розных сустрэчах. Мамы, на жаль, ужо няма ў жывых, але нам удалося выдаць яе мемуары у кнізе «Наталля Міцкевіч. «Доўгая дарога. Ад дома Янкі Маўра да дома Якуба Коласа». У мяне тры ўнучкі - Лілія, Юлія і Наталля. Апошніх двух нарадзіла мая дачка Васіліна. Я цяпер выйшла на пенсію, паспрабую прысвяціць больш часу ўнучкам. Але, вядома, вывучаю жыццё і творчасць сваіх знакамітых дзядоў. У выдавецтве «Кнігазбор» выйшла кніга «Янка Маўр», матэрыялы для якой я рыхтавала, а прадмову напісала дачка Васіліна.

Праўнучка Якуба Коласа - кандыдат сацыялагічных навук, яна працуе галоўнай захавальніцай фондаў Дзяржаўнага літаратурна-мемарыяльнага музея Якуба Коласа. Муж Васіліны, бацька маленькай Наталлі і яе трохгадовай сястры Юліі - Яўген Стэльмах. Спадчынніцы класікаў носяць прозвішча Міцкевіч - паводле традыцыі ўсім дзяўчынкам у сям'і, нашчадкам Якуба Коласа, перадаецца прозвішча іх знакамітага продка. Дарэчы, жыве сям'я па суседстве з домам, дзе жыў пясняр і ў якім зараз размешчаны музей Якуба Коласа. Дома дзяцей вучаць беларускай мове і паміж сабой сваякі маюць зносіны па-беларуску.

Як пазнаёмілася зорная пара

Бацькі цяперашняй пенсіянеркі Марыі Міцкевіч - дзеці класікаў - пражылі разам амаль 65 гадоў. Іх дачка добра ведае гісторыю знаёмства зорнай пары:

- Упершыню яны сустрэліся, калі ім было гадоў па пяць, на ёлцы ў Доме літаратара. Колас і Маўр ўжо сябравалі ў той час і прывялі на свята сваіх дзяцей. Янка Маўр паказаў Наташы на хлопчыка: «Бачыш, вунь той самы Міхась, пра прыгоды якога мы чытаем з табой кнігу». Але па-сапраўднаму пазнаёміліся яны ўжо студэнтамі Маскоўскага авіяцыйнага інстытута. Неяк Наталля на вакацыях у Менску забылася дома свой пропуск, і яе бацька, даведаўшыся, што Міхась яшчэ ў Менску, папрасіў яго зайсці, каб захапіць пропуск і перадаць дачцэ. У Маскве, аддаючы дакумент Наталлі, Міхась не ўтрымаўся і з'едліва пажартаваў: «А на фатаграфіі ты прыгажэйшая!» Але ўсё ж такі пачаў заляцацца да дзяўчыны. Калі яны вырашылі ажаніцца, Міхась прапанаваў: «Давай ты патэлефануеш свайму бацьку і скажаш, што я ажаніўся, а я паведамлю свайму, што ты выйшла замуж». Так і зрабілі. Якуб Колас выслухаў навіну і вусам нічога ніякага. А Янка Маўр зацікавіўся і дамогся прызнання дачкі. І вось двое калегаў сустракаюцца ў Саюзе пісьменнікаў. Колас віншуе Маўра з замужжам дачкі. Маўр дзякуе і пытаецца: «Ну і што мы будзем рабіць з нашымі дзецьмі?» Колас у адказ здзіўляецца: «Твая дачка выходзіць замуж, што хочаш, то і рабі». Маўр так разгубіўся, што прыйшоў дахаты і кажа жонцы: «Колас не прызнае Наташу нявесткай». Патэлефанавалі Наташы ў Маскву, яна - у плач.

Маўр ідзе да Коласа дадому. Там сустракае хатнюю прыслужніцу, якая тут жа цікавіцца: «А ці не за Міхася ваша Наталля выйшла замуж?» «А вы быццам гэтага не ведаеце?» - здзіўляецца Янка Маўр. Колас нарэшце зразумеў, як разыграў яго сын, узяў з серванта чаркі і прапанаваў свату адзначыць такую падзею.

У шлюбе дзеці пісьменнікаў выгадавалі траіх дзяцей: Сяргея, Кастуся і Марыю. Наталлі не стала ў 2012 годзе.