Волкер і Мэціс уважаюць, што Украіне патрэбная смяротная зброя

Але пастанову пра перадачу Украіне зброі будзе прымаць Дональд Трамп.

Пасля сустрэчы з памочнікам прэзідэнта РФ Уладзіславам Сурковым спецпрадстаўнік Дзярждэпу ЗША Курт Волкер абмяркуе сітуацыю на Данбасе з кіраўніком Пентагона Джэймсам Мэцісам. Такое меркаванне ў каментары выданню «Гордан» выказаў украінскі генерал-лейтэнант запасу Ігар Раманенка.

«На мой погляд, у Волкера ўжо ёсць напрацоўкі. Між іншым, учора ён сустракаўся з Сурковым. Думаю, Волкер і Мэціс абмяняюцца сваімі думкамі. Чаго-небудзь істотнага ад першай сустрэчы Волкера і Суркова чакаць не выпадае. Трэба разумець наступнае: нягледзячы на тое, што Мэціс займае вельмі важную пасаду, пастанову аб перадачы Украіне зброі будзе прымаць Трамп (прэзідэнт ЗША Дональд Трамп. - Заўвага.). Напэўна ён чакае дакладу ад Волкера. Хоць варта прызнаць, што цяпер мы максімальна наблізіліся да таго, каб ЗША перадалі Украіне лятальную зброю. Тры гады яны самі сябе ўгаворвалі і знаходзілі розныя аргументы, каб гэтага не рабіць», - адзначыў Раманенка.

На ягоную думку, Волкер і Мэціс прыйшлі да высновы, што Украіне неабходная амерыканская смяротная зброя.

«Мэціс і Волкер заўсёды аб'ектыўна ацэньвалі сітуацыю ва Украіне. Будучы прафесіяналамі, яны зразумелі, што нам трэба дапамагаць абараняцца, а значыць, пастаўляць зброю і тэхніку. А падчас учорашняй сустрэчы Волкер і Суркоў вызначылі, што цяперашняя сітуацыя на Данбасе не задавальняе ніводны з бакоў», - падкрэсліў Раманенка.

Украіна з пачатку вайсковай агрэсіі Расеі вясной 2014 года вядзе перамовы з заходнімі краінамі пра пастаўкі смяротнай зброі, але пакуль беспаспяхова. На гэты момант ЗША забяспечваюць Кіеў толькі несмяротнай дапамогай (у тым ліку браніраванымі аўтамабілямі Humvee, беспілотнікамі RQ-11B Raven і контрбатарэйнымі радарамі) і дапамагаюць у падрыхтоўцы ўкраінскіх вайскоўцаў.

31 ліпеня выданне The Wall Street Journal напісала, што ў ЗША распрацавалі план пастаўкі абарончага ўзбраення Украіне. Гаворка ідзе пра перадачу процітанкавых ракетных комплексаў Javelin і сродкаў супрацьпаветранай абароны.

21 жніўня трохгадзінныя перамовы Суркова з Волкерам прайшлі ў Менску ў закрытым для журналістаў рэжыме. Амерыканскі дыпламат пакуль не даваў каментароў. Прадстаўнік Расеі назваў сустрэчу «карыснай і канструктыўнай».

Каментуючы перамовы Волкера і Суркова, намеснік міністра ў пытаннях часова акупаваных тэрыторый Украіны Юрый Грымчак заявіў, што пастанова аб вывадзе войскаў РФ з Данбаса ўжо прынятая.

На думку Мэціса, міжнароднай супольнасці неабходна працягваць аказваць дыпламатычны ціск на РФ праз яе агрэсію супраць Украіны.