Мікалая Статкевіча пасадзілі пад арышт, тэрмін выканання якога скончыўся

Палітык адбывае адміністрацыйнае пакаранне на пастанову суда, вынесенага яшчэ ў траўні.

Аднаго з лідараў Беларускага Нацыянальнага Кангрэсу Мікалая Статкевіча пасадзілі на Акрэсціна, хоць тэрмін выканання пакарання для яго ўжо скончыўся. Пра гэта паведаміла ў Facebook жонка палітыка Марына Адамовіч.

Яна звярнулася ў Цэнтр ізаляцыі правапарушальнікаў, дзе ёй паведамілі, што Статкевіч адбывае адміністрацыйнае пакаранне на пастанову суда, вынесенага яшчэ ў траўні. Гаворка ішла пра акцыю 1 траўня, перад якой палітыка прэвентыўна затрымалі.

Марына Адамовіч адзначае, што згодна з заканадаўствам тэрмін на выкананне такога пакарання складае два месяцы - гэта значыць, Мікалая Статкевіча павінны былі арыштаваць не пазней чым у ліпені, а цяпер тэрмін мінуў. Аднак ён змешчаны ў ізалятар.

Нагадаем, што экс-кандыдата ў прэзідэнты і аднаго з лідараў Беларускага Нацыянальнага Кангрэсу Мікалая Статкевіча затрымалі 26 жніўня прыблізна а12.00, калі ён выйшаў з дому на сустрэчу. Марына Адамовіч звязвае гэтае затрыманне з акцыяй пратэсту, якую апазіцыя мае намер зладзіць у Менску 8 верасня.