Бараўлянскі супраціў рыхтуецца атачаць лес жывым ланцугом

Жыхары пасёлка пратэстуюць супраць высечкі лесу.

Жыхары Бараўлянскага сельсавета Менскага раёна, якія пратэстуюць супраць высечкі векавога лесу каля іх дамоў, а таксама намераў збудаваць на вызваленым месцы аб'екты сацкультбыту, збіраюцца арганізаваць акцыі пратэсту ў знак нязгоды з горадабудаўнічай палітыкай уладаў.

Жывы ланцуг вакол лясы і пікет выканкамаў

«Вось літаральна саджуся пісаць заяўку на тры масавыя мерапрыемствы, - кажа «Свабодзе» адзін з актывістаў бараўлянскага супраціву Іван Вайтовіч. - Па-першае, плануем ачапіць жывым ланцугом участак лесу, запланаваны пад знішчэнне. Па-другое, мітынг каля Бараўлянскага сельскага выканкама. Па-трэцяе, пікетаванне Менскага раённага выканаўчага камітэта. Паводле нарматываў, заяўка павінна быць накіраваная за 15 дзён да мерапрыемства, але будзем папярэджваць: калі людзі выйдуць масава і стыхійна раней за тэрмін, гэта застанецца на сумленні перш за ўсё тых, хто давёў іх да такога стану».

Як удакладніў суразмоўца, пратэстныя акцыі адбудуцца на ўказаныя адрасы 6, 7 і 9 кастрычніка адпаведна.

Як паведамлялася раней, жыхары пратэстуюць супраць высечкі лесу, асваення вызваленай тэрыторыі і пракладкі новай шашы побач з дамамі. Іх падтрымалі жыхары пасёлкаў Ляскоўкі, Ляснога.

Гаворка ідзе пра высечку масіву на 5 гектарах - улады хочуць знішчыць лес, правесці камунікацыі, пабудаваць школу і дзіцячы сад, а потым і жылыя дамы. Жыхары мяркуюць, што мэтазгодна весці будоўлю на вольным месцы - на полі. А спачатку трэба забяспечыць такой патрэбнай інфраструктурай тых, хто ўжо жыве ў Бараўлянах і ваколіцах.

Аднак іх аргументы застаюцца не пачутымі. Як кажа Іван Вайтовіч, геадэзісты ўжо пачалі браць у лесе пробы грунту, каб падрыхтаваць глебу для пачатку будаўнічых работ. Пра гэта сведчаць і дакументы, актывістам удалося здабыць па сваіх каналах:

«Патрэбную інфармацыю мы атрымліваем праз розныя крыніцы, афіцыйна яе атрымаць немагчыма. Дык вось атрымалася патрымаць у руках «Загад на выкананне геадэзічных работ». Гэта значыць, прыязджала свідравальная ўстаноўка, рабіла свідравіны, спецыялісты вывучалі характарыстыкі апорнай глебы. Стандартная працэдура, якая звычайна папярэднічае актыўным будаўнічым работам. Мы бачылі, што дазвол выдаў Бараўлянскі выканкам, і гэта звязана з будаўніцтвам школы або дзіцячага саду. Гэта значыць, нам даюць зразумець, што механізм закруціўся, пайшлі выдаткі, фінансаванне будаўніцтва на месцы лесу. Нас гэта, безумоўна, напружвае».

Дагрукацца да Лукашэнкі і адклікаць «дэпутатаў»

Крыху раней паўстала ініцыятыва адклікання «дэпутатаў», якія балатаваліся з населеных пунктаў Бараўлянскага сельсавета, уключаючы старшыню «савета дэпутатаў» Менскага раёна Сяргея Шаблыку. Таксама агучаныя намеры праз Генпракуратуру і «парламент» адклікаць Івана Ліпніцкага, старшыню «савета дэпутатаў» Менскай вобласці. Жыхары перакананыя: выбраныя асобы не толькі нічога не робяць для развязання праблемных пытанняў, а непасрэдна датычныя да ўвядзення грамадскасці ў зман.

«У Менаблвыканкаме адбылося пасяджэнне савета аб архітэктуры і будаўніцтву, - прадаўжае Іван Вайтовіч. - Праект ухвалены без усякага ўліку меркавання ініцыятыўнай групы. Мы падрыхтавалі пярэчанне, бо катэгарычна не згодныя з такім сцэнаром асваення ляснога масіву - гэта поўная неадпаведнасць пажаданням людзей, якія там жывуць. На прыёме ў адміністрацыі Лукашэнкі перадалі прапановы, як развязаць канфліктную сітуацыю. Сёння нашы прадстаўнікі ў камітэце Дзяржкантролю. З намі трэба лічыцца: як-ніяк сабрана 4,5 тысячы подпісаў. Толькі частка, якую паспелі ахапіць фізічна. 80-90% тых, да каго мы звярталіся, падпісваліся без пытанняў».

Паводле слоў Івана Вайтовіча, людзі перш за ўсё падпісаліся пад тым, што яны супраць далейшага ўшчыльнення ў Бараўлянах, якое не ўлічвае складаную сітуацыю вакол сацыяльных аб'ектаў - школ, садкоў, паліклінік, спартовых пляцовак. Усё гэта павінна быць у крокавай даступнасці, а не ў чыстым полі, якое хочуць стварыць за кошт знішчэння лесу.

У падтрымку сваіх патрабаванняў жыхары вывешваюць на дамах плакаты ў абарону лесу. А таксама выказваюць гатоўнасць за ўласныя сродкі абсталяваць паркавую зону з лаўкамі, арэлямі, дарожкамі на лясной тэрыторыі, вызначанай пад высечку. Побач знаходзіцца дзіцячы анкалагічных цэнтр, дзіцячая вёска, шматкватэрныя дамы, куды маленькія пацыенты з бацькамі і жыхары панэльных дамоў маглі б прыходзіць і адпачываць на паветры. Сапраўднага парку ў пасёлку няма і не было.

Калі кампанія супраціву і паходаў па дзяржаўных інстанцыях не будзе мець выніку, актывісты з ініцыятыўнай групы за выратаванне бараўлянскага лесу пакідаюць за сабой права падаць у суд на аўтараў забудовы за наўмыснае прычыненне шкоды прыродзе і некалькім дзясяткам тысяч грамадзян.