Турыст: Здаецца не ў Парыж еду, а ў Менск. Чаму гатэлі такія дарагія?

Колькі каштуюць і як выглядаюць самыя танныя і самыя прэстыжныя нумары ў сталіцы.

Менск - дзіўны горад: тут пражывае адна пятая ўсяго насельніцтва краіны, дарагі квадратны метр і не менш дарагія ўстановы грамадскага харчавання, піша onliner.by.

У сталіцы няма сусветных славутасцяў, дзеля якіх падарожнікі будуць гатовыя ехаць з іншага канца свету. Ды і маштабнага наплыву турыстаў не відаць. Сукупнасць усіх гэтых складнікаў зусім не азначае, што часовае пражыванне ў горадзе-героі абыдзецца падарожніку танна. У тым, што Менск - для багатых, давялося пераканацца расейцу Мікалаю.

«Я ў невялікім шоку ад коштаў на гатэлі ў Беларусі, - падзяліўся сваімі назіраннямі падарожнік. - Здаецца, не ў Парыж еду, а ў Менск. Мабыць, гатэльны бізнэс арыентаваны перш за ўсё на замежнага турыста, які і такія кошты прыме. Я ў Маскве магу ледзь не ўдвая танней нумар забраніраваць».

Спрачацца з маладым чалавекам цяжка: кошты на гатэльныя нумары, як правіла, «куслівыя». Паглядзім на самыя даступныя і самыя дарагія менскія гатэлі бліжэй, уявіўшы, што нам трэба забраніраваць адзін двухмесны нумар на ноч з 30 верасня на 1 кастрычніка.

$30 у дзень - і ён ваш

Самы даступны варыянт пражывання ў Менску прапануе гатэль «Ваяж». Гатэль быў адкрыты яшчэ ў 2013 годзе і адразу пазіцыянаваўся як бюджэтны. Шасціпавярховы будынак, доўгі час заставаўся «закінутым», адрамантавалі і сталі запрашаць гасцей. Нумар абыдзецца ў $29 у дзень (аднамесныя і зусім $26). На booking.com рэйтынг у гатэля вельмі добры - сярэдняя адзнака 8,6 бала. А з нараканняў шматлікіх пастаяльцаў - толькі дарагоўля сняданкаў і аддаленасць ад цэнтра (мабыць, жыхары трапляюцца якія разумеюць і не «грамяць» гатэль у пух і прах, як гэта робяць насельнікі нумароў люкс у пяцізоркавых гатэлях).

У катэгорыю «ўваход да $35» трапляюць яшчэ блізу 7 сталічных гатэляў, на фоне якіх выгадна вылучаецца новы двухзоркавы Aqua-Minsk Hotel - яго рэйтынг на міжнародным сэрвісе 9,1 бала. Гатэль размешчаны ўсяго за 150 метраў ад аквапарку «Лебядзіны». Прыемным бонусам да пражывання ідзе магчымасць бясплатна наведваць адну з зон аквапарку і трэнажорную залю. Мінусы пастаяльцы ўсё ж такі знайшлі: адсутнасць маскітных сетак на вокнах і, такім чынам, прысутнасць камароў, а таксама адсутнасць кандыцыянера і не мяккая пасцельная бялізна.

$150 за базавы набор

Найбольш высокі кошт за дзень у стандартным нумары просяць у гатэлі «Еўропа». Гэта, вядома, пяць зорак, самы цэнтр горада і бурлівае начное жыццё за акном, але і заплаціць за задавальненне давядзецца прыстойна - $150 у дзень. У гэтую суму не ўваходзіць сняданак (калі жадаеце яго дадаць, раскашэліцца давядзецца адразу на $203 у дзень, і гэта ўсё яшчэ без магчымасці бясплатнага скасавання браніравання). Пастаяльцы тут больш пераборлівыя: ім не падабаецца не толькі кошт, але таксама шум, стаўленне персаналу, адсутнасць праса ў нумары, пракураныя нумары і падушкі з сінтэпону. І ўсё ж агульная адзнака ў прыгожага гатэля вельмі дастойная - 8,9 бала.

Яшчэ адзін топ-гатэль (па цане і рэйтынгу) - пачатковец DoubleTree by Hilton. Адзнака - 9,4 бала, арыгінальная архітэктура, удалае размяшчэнне ў пачатку праспекта Пераможцаў, свежыя нумары. Гатэль прыняў першых наведвальнікаў 14 снежня 2016 года, прайшоў ужо амаль год, а водгукаў назапасілася нямала - 691. У асноўным станоўча-захопленыя. Але ёсць і мінусы. «Такім чынам, 200 даляраў аддалі, паглядзім, што ў міні-бары: дзве маленькія колы ў пустой лядоўні. Добра, тут ёсць панарамны бар, пасядзім увечары, вып'ем кавы - прабачце, усе месцы занятыя гасцямі з вуліцы, і наогул у нас дэпазіт 75 даляраў за дваіх. Ва ўсіх гатэлях нашай паездкі адчуваеш сябе чалавекам, а тут - пігмеем», - напісаў Андрэй.

«Дзве ночы запар на 15-м паверсе немагчыма заснуць праз жахліва гучныя басы з бара на 21-м паверсе да трох раніцы!!! Персанал на рэцэпшане ў адказ на скаргу прапанаваў перасяліць нас ніжэй, на 10. Дзякуй, вядома, але, ці не можна, прасцей дамовіцца і зрабіць музыку ў бары цішэйшай? Цікава, а як даводзіцца наведвальнікам на 16-20-х паверхах, калі на 15-м вібруюць вокны? Вельмі крыўдна, што вялізны, якасны і дарагі гатэль рэспектабельнай міжнароднай сеткі не можа ці не хоча дамовіцца з нейкім тусовачным барам у сябе ж на даху, і дзясяткі пастаяльцаў, заплаціўшы вялікія грошы, проста не могуць заснуць. Сумна...»- паскардзіўся Сяргей.

Грошы і напраўду вялікія - дзень без сняданку і магчымасці скасавання браніравання каштуюць $135. Сняданак - яшчэ $20, але гэта калі вы захочаце самі, прымушаць ніхто не будзе. Хочацца падстрахавацца і мець опцыю скасавання браніравання - даплаціць грошы і перайдзі ў катэгорыю $150 за дзень.

Кошт пражывання ў беларускіх гатэлях (нават якія не належаць да знакамітых сусветным сетак) высокі. Калі браць нумар у «пяцёрцы» з усімі дадатковымі «опцыямі», ледзь укладзешся ў $200 на дзень.