Намеснік міністра працы «схітраваў» наконт пенсій «чарнобыльцаў»

Самі «чарнобыльцы» такіх пенсій не бачылі.

У Міністэрстве працы і сацыяльнай абароны распавялі, у каго ў Беларусі самыя высокія пенсіі, без уліку вайскоўцаў. Як выявілася - чыноўнікі схітравалі.

Падчас онлайн-канферэнцыі на сайце Белта намеснік міністра Валерый Кавалькоў адзначыў, што «самыя высокія сумы пенсій у сістэме сацыяльнай абароны атрымліваюць работнікі лётнага і лётна-выпрабавальнага складу цывільнай авіяцыі, а таксама асобы, якія бралі ўдзел у ліквідацыі наступстваў катастрофы на Чарнобыльскай АЭС, і іх утрыманцы», піша belaruspartisan.org.

Сапраўды ліквідатары наступстваў аварыі на ЧАЭС атрымліваюць самыя высокія пенсіі ў Беларусі?

«Мая сярэдняя пенсія ў краіне складае 290 рублёў (на сёння - блізу 149 даляраў - заўв.рэд.)», - распавёў «Беларускаму партызану» вайсковы хімік з Горадні Генадзь Марчук, які быў у ліку першых ліквідатараў аварыі і працаваў непасрэдна на самой станцыі.

Адзначым, што на сёння сума сярэдняй пенсіі ў Беларусі складае 300 рублёў, або 154,6 даляры.

«Адзіная пенсійная перавага для людзей, якія ўдзельнічалі ў ліквідацыі наступстваў аварыі на ЧАЭС у 1986 годзе і працавалі ў першай, 10-кіламетровай зоне на самой станцыі - гэта я кажу на сваім прыкладзе і прыкладзе калег - гэта магчымасць выхаду на пенсію на дзесяць гадоў раней. Гэтую льготу пакуль ніхто не скасаваў, але тут праблема ў іншым - працэс давядзення надта ўскладнены. Два гады таму я дамогся выхаду на пенсію, давёў, што я сапраўды ўдзельнічаў у ліквідацыі наступстваў аварыі, падымаў дакументы, рабіў запыты ў архіў Міністэрства абароны РФ. На гэта ў мяне сышоў год. Мае калегі ў такой жа сітуацыі, ёсць тыя, што сутыкаюцца з цяжкасцямі, бо некаторыя архівы страчаныя. Гэта значыць, нам выпадае даводзіць, што мы там былі, у пэўным месцы ў пэўны час. Што да сумы пенсіі, яна не адрозніваецца ад пенсій звычайных грамадзян», - адзначыў наш суразмоўца.

Раней, у савецкі час і 1990-я гады, у ліквідатараў былі добрыя льготы. Гэта зніжкі на лекі, прэферэнцыі пры стацыянарным лячэнні, накіраванні на санаторна-курортнае лячэнне. Сёння нічога гэтага няма - усё скасавалі.

«У Беларусі наогул сёння няма разумення «ліквідатар», яго скасавалі. Цяпер мы называемся проста «пацярпелымі ад аварыі на ЧАЭС». Хоць апрыёры мы павінны мець іншы статус - як гэта ў Расейскай Федэрацыі, ва Украіне. Ліквідатары - гэта адно, а перасяленцы - ужо іншае. Але цяпер нас усіх разглядаюць аднолькава. Гэта, мякка кажучы, не зразумела. Таму мы разумеем, што ўвага да ліквідатараў у краіне мінімальная. Хоць нас не так ужо шмат і засталося. Ва Украіне і Расеі ўсё па-іншаму. Там ліквідатар – гэта статус, ён мае льготы, дзяржава яму ўдзячная у розных формах – і маральнай, і матэрыяльнай», - распавядае Генадзь Марчук.

Паглядзім, якая сітуацыя з пенсіямі ды льготамі для ліквідатараў у Расеі і Украіне.

Пенсія чарнобыльцам у 2017 годзе ў Расеі вылічаецца ў залежнасці ад індывідуальных параметраў кожнага грамадзяніна. Улічваюцца асобныя характарыстыкі заяўніка, ягонае пражыванне ў небяспечнай зоне, наяўнасць праблем са здароўем. Увогуле, шырока распісаныя шмат пунктаў.

У РФ ліквідатары наступстваў аварыі на ЧАЭС могуць атрымліваць або дзяржаўную пенсію з прычыны старасці, якая складае 250% ад сумы сацыяльнай (пасля індэксацыі ў красавіку 2016 года яна складае 12 399,63 рублёў - на сёння прыблізна 213 даляраў), або, калі ліквідатар атрымаў інваліднасць, - пенсія для інваліда, якая, праўда, складае 125% (з 1 красавіка — 6 199,81 рублёў - прыблізна 107 даляраў), гэта значыць, удвая меншая.

Акрамя гэтага, для ліквідатараў і пацярпелых ад аварыі на ЧАЭС існуюць льготы, звязаныя з медыцынскім забеспячэннем (льготнае абслугоўванне ў лякарнях, паліклініках і санаторыях, льготы на куплю лекаў і г. д.), працаўладкаваннем (напрыклад, ёсць магчымасць атрымаць адпачынак на працоўным месцы па-за графікам у той момант, калі гэта будзе зручна), а таксама з паступленнем у ВНУ па-за конкурсам.

Ва Украіне падзяляюцца статусы і льготы для ліквідатараў, іх сем'яў, дзяцей, а таксама пацярпелых і перасяленцаў. Так, згодна з украінскім заканадаўствам, самі ліквідатары маюць права:

Бясплатнага праезду ў грамадскім транспарце;

Набыццё лекавых прэпаратаў бясплатна, альбо са зніжкай;

Па-за чаргой прайсці медыцынскіх спецыялістаў для абследавання бясплатна;

-50% ад кватэрнай платы;

З прычыны беспрацоўя – дапамога ў выпадку страты працоўнага месца, выплачваецца да 5 месяцаў.

Першачарговае захаванне працоўнага месца;

Магчымасць карыстацца паслугамі шпіталёў, да якіх прыпісаны на льготных умовах.

Мінімальная сума пенсіі для ліквідатараў у залежнасці ад катэгорыі ўстаноўленая на ўзроўні 285%, 255% і 225% сацыяльнай (117, 105 і 92 даляра адпаведна - у 2015 годзе). Кожны год пастановай уладаў гэтая сума павялічваецца на нейкую колькасць адсоткаў плюс да росту мінімальнай пенсіі ва Украіне.

Чытайце нашае вялікае інтэрв'ю з Генадзем Марчуком пра падзеі 31-гадовай даўніны, калі ліквідатары не дазволілі нашай краіне ператварыцца ў ядзерную пустэльню.