У Гародні чыноўнікі прымусілі пенсіянера двойчы аплаціць «камуналку»

Камунальнікі вылічылі запазычанасць у пенсіянера, а цяпер самі яму вінныя.

Кожны дзявяты ўласнік кватэры не плаціць за камунальныя паслугі. А пенсіянер Іван Іванавіч запазычанасць у кватэрнай плаце сплаціў... двойчы, але вярнуць «лішнія» грошы не можа ўжо амаль паўгода, піша vgr.by.

Недалічыўся 67 рублёў

Кватэра на вуліцы Таўлая, 42 была зарэгістраваная на старэйшага сына. Сын страціў працу і некалькі месяцаў не плаціў за «камуналку». Утварылася запазычанасць - больш за 190 рублёў. Усю суму сям'я сплаціла, а праз некалькі дзён кватэру размянялі. Цяпер там жывуць новыя гаспадары.

Якое ж было здзіўленне Івана, калі праз некалькі дзён пасля абмену кватэры ён прыйшоў па пенсію, а яму замест належных 280 рублёў выдалі на 67 рублёў менш. Выявілася, ужо сплачаную суму камунальнай запазычанасці зноў утрымалі. Куды ні звяртаўся пенсіянер, дайшоў да ўправы юстыцыі аблвыканкаму, але дагэтуль не можа вярнуць залішне аплачаныя грошы.

- Усе згаджаюцца, што была дапушчаная памылка, але нічога зрабіць не могуць. Судовы выканаўца, які спаганяў суму, звольнены. У КУДП «АІРКЦ» кажуць, што грошы пайшлі выканаўцам паслуг, цяпер трэба звяртацца ў розныя камунальныя службы. Але памылка не мая, я нават не ўласнік кватэры, паведамленняў аб прымусовым выкананні не атрымліваў, як мне вярнуць грошы? - наракае пенсіянер.

Няма адклікання - запазычанасць усё адно ўтрымаюць

Як высветлілася, суму паўторна вылічылі, бо сам Іван Іванавіч, ягоны сын, спецыялісты АІРКЦ не паведамілі судоваму выканаўцу, што запазычанасць ужо сплачаная. Як вынікае з адказу Галоўнай управы юстыцыі аблвыканкама, «з КУДП «Адзіны інфармацыйны разлікова-касавы цэнтр» адкліканне ў дачыненні да выканаўчага дакумента ў сувязі з поўным выкананнем абавязання не паступала». А раз няма адклікання - запазычанасць усё адно ўтрымліваецца.

- Выкананне можа быць спыненае, калі чалавек сплаціў запазычанасць, але паведаміў аб гэтым судоваму выканаўцу. Гэта можа зрабіць альбо сам вінаваты, альбо спагнальнік (у гэтым выпадку АІРКЦ) у тэрмін адзін дзень пасля сплаты запазычанасці. Каб вярнуць грошы, гарадзенцу трэба звяртацца ў арганізацыю, на рахунак якой яны паступілі, - патлумачыла начальніца аддзела прымусовага выканання Ленінскага раёна Гародні Святлана Балкунова.

Збіраць грошы давядзецца па драбках

У АІРКЦ патлумачылі: сачыць за ўсімі асабовымі рахункамі, якіх у горадзе больш за 70 тысяч, немагчыма. Усе вінаватыя атрымліваюць паведамленні аб тым, што трэба аплаціць запазычанасць. На гэта зазвычай даeцца блізу дзесяці дзён. Не заплаціў - складуць выканаўчы дакумент, засведчаць у натарыюса і накіруюць у аддзел прымусовага выканання. Там ужо вызначаецца, адкуль утрымаць запазычанасць - напрыклад, з заробку або пенсіі, як было ў Івана Іванавіча. З трох зарэгістраваных у кватэры пенсіянер выявіўся самым платаздольным: старэйшы сын нідзе не працаваў, а малодшы з’ехаў за мяжу.

- Грошы мы маглі вярнуць за кошт будучых аплат, але пенсіянер больш там не жыве. Цяпер яму трэба звярнуцца з заявамі да выканаўцаў паслуг, а гэта чатыры арганізацыі - УЖРЭП Ленінскага раёна, гарадская ЖКГ, Спецаўтагаспадарка, Белдзяржстрах, - патлумачыла вядучая юрысконсультка аддзела прававой і кадравай работы КУДП «АІРКЦ» Аксана Хоха.

Як падлічыў Івана, гарадская ЖКГ яму вінная 6,23 рубля, УЖРЭП Ленінскага раёна - 36,15 рубля, Спецаўтагаспадарка - 3,71 рубля, Белдзяржстрах - 2,23 рубля. Агулам - 48,32. Астатнія 19,19 рубля вярнуць не выпадзе, бо паводле закону ў выпадку прымусовых дзеянняў у маёмасных спагнаннях вінаваты сам аплачвае прымусовы збор. Дарэчы, пакуль толькі страхавая кампанія вярнула пенсіянеру «лішнія» грошы.

Кожны дзявяты не плаціць за «камуналку»

Паводле інфармацыі КУДП «АІРКЦ», на 1 жніўня ў Гародні зарэгістравана амаль 73 000 асабовых рахункаў у дамах, якія абслугоўваюць УЖРЭП. З іх каля 8000 – вінаватыя за камунальныя паслугі. Агульная сума запазычанасці - больш за 2 мільёны рублёў (больш за мільён даляраў). Паводле закону, сям'я, якая жыве ва ўласнай або сацыяльнай кватэры і не плаціць за камунальныя паслугі шэсць і больш месяцаў, можа быць выселеная. Для тых, хто здымае дзяржаўнае жылто, тэрмін яшчэ меншы - два месяцы.