У Жыткавічах чыноўнікі «ўваскрэсілі» чалавека

Беларускія «Мёртвыя душы» нічым не саступаюць твору Гогаля.

Зыходзячы з ведамаснай справаздачнасці, ад зарастання пустазеллем свой зямельны пляц ачысціў грамадзянін, памерлы яшчэ 7 гадоў таму, паведамілі ў праграме Навіны «24 гадзіны» на СТВ, піша сайт «Моцныя навіны».

Пра тое, што трэба быць гаспадаром на сваёй зямлі, беларусам нярэдка нагадваюць у пісьмовай форме.

Штогод прадпісанні навесці парадак на сваім пляцы атрымліваюць тысячы чалавек. Як выявілася, выпісваецца іх яшчэ больш.

Аляксандр Дабрыян, СТВ:

Прадпісанне па навядзенні парадку выпісанае і вось на гэты адрас. Калі верыць дакументам землеўпарадчыкаў, гэта прыватнае домаўладанне. Фактычна з 1937 года тут працуе базавая школа. Стан тэрыторыі блізкі да ідэальнага: роўны газон, прыгожыя кветкі і малыя архітэктурныя формы.

Дырэктар школы Ірына Салей і слыхам не чула ні пра якія прадпісанні землеўпарадчыкаў.

Парадак на школьным двары тут і так круглы год.

Гэтай службы ў нас не было. Як бачыце, у нас парадак наведзены, і яго мы падтрымліваем заўсёды. Гэта школа, і патрабаванні ў нас цяпер такія.

Далей - больш: высветлілася, што чалавек, на прозвішча якога выпісанае прадпісанне, пакінуў свет жывых 7 гадоў таму.

Аднак, мяркуючы з запісу ў часопісе землеўпарадкавальнай службы, гэта не перашкодзіла яму ліквідаваць усе парушэнні своечасова і напоўніцу. Падзяліцца досведам уваскрашэння памерлых на камеру ў раённай землеўпарадкавальнай службе не пагадзіліся.

Запіс размовы:

Вядзецца рэйтынгавая табліца сярод раёнаў, ніхто не хоча быць у канцы. Трошкі гэта спрыяе. - Гэта спаборніцтва, стымул? - Так, стымул больш.

У пагоні за паказчыкамі пры складанні фіктыўных прадпісанняў чыноўнікі карысталіся базамі звестак (як высветлілася, не самымі дакладнымі).

Выязджаць і правяраць на месцы ў спецыялістаў проста не было часу: тры супрацоўнікі службы за год вынеслі 1500 прадпісанняў. Паказчыкі сапраўды рэкордныя: столькі ж, колькі ў адным Жыткавіцкім раёне, вынеслі прадпісанняў, напрыклад, ва ўсёй Берасцейскай вобласці.

Тарас Крывусёў, начальнік аддзела Камітэта дзяржаўнага кантролю Гомельскай вобласці:

Служба дала справаздачу за выдачу 3500 прадпісанняў. Пры гэтым 1500 прадпісанняў спецыялісты службы дакументальна пацвердзіць не змаглі. Пры гэтым з наяўных у службе прадпісанняў больш за 40 выдадзена фіктыўна, грамадзянам альбо памерлым, альбо тым, якія не з'яўляюцца ўласнікамі зямельных надзелаў.

Згодна з усё той жа справаздачнасцю, землеўпарадкавальныя службы Гомельскай вобласці цягам апошніх гадоў займаюць лідаруючыя пазіцыі. Аднак вынікі апошняй праверкі ставяць гэтыя звесткі пад сумнеў.