Аляксандр Кваснеўскі: Нямеччына дасць новы імпульс Еўропе

Ніколі Еўразвяз не сутыкаўся са столькімі праблемамі адразу.

Прасоўваць стандарты ЕЗ і захаваць яго адзінства можна толькі пад кіраўніцтвам ФРГ, мяркуе экс-прэзідэнт Польшчы. Надзейнасць у перыяд хаосу, узяцце на сябе адказнасці ў цяжкія часы, мужнасць у прыняцці пастаноў перад тварам новых і невядомых задач - вось так коратка можна апісаць тое, чаго я чакаю ад Нямеччыны. Ці думаюць аналагічна нямецкія выбаршчыкі, стане зразумела праз некалькі дзён, піша Аляксандр Кваснеўскі для «Нямецкай хвалі».

Галасаванне ў Нямеччыне не выклікае такіх эмоцый, як нядаўнія выбары ў Нідэрландах, Вялікай Брытаніі ці Францыі. І добра, што так. Палітычны ландшафт у ФРГ даволі стабільны, і гэта дае нам у Еўропе ўпэўненасць, што асновы нямецкай палітыкі не зменяцца.

Гэта важна, бо мінулыя гады былі поўныя пературбацый і крызісаў. У многіх краінах яны спараджалі хвалі папулізму і мацнеў нацыянальны эгаізм. Яны выявілі рост слабасці традыцыйных партый і палітычных элітаў. Нямеччына, якая таксама не цалкам пазбегла гэтых феноменаў, аднак застаецца месцам стабільнасці і вернасці еўрапейскім каштоўнасцям. І ФРГ валодае неабходным патэнцыялам для пераадолення гэтых сур'ёзных выклікаў.

Еўропе патрэбен новы імпульс

Я з нецярпеннем чакаю выбараў у бундэстаг, бо развязанне нарастальных праблем у Еўропе і вакол яе не трывае далейшай неадкладнай рэакцыі. Адразу пасля выбараў неабходны новыя праекты для ўмацавання еўрапейскай інтэграцыі і яе хуткага прасоўвання.

І Еўропа - як ніколі да гэтага - залежыць ад актыўнай уцягнутасці Нямеччыны і яе кіраўніцтва. Немцам проста наканаваная гэтая ключавая роля: ФРГ - найбуйнейшая еўрапейская эканамічная дзяржава, і разам з Францыяй Нямеччына - дзве рухаючыя сілы еўрапейскай інтэграцыі - валодае багатым адпаведным досведам.

У сілу сваёй гісторыі Нямеччына таксама выпрацавала неабходную адчувальнасць і разуменне праблем краін Цэнтральнай і Усходняй Еўропы. Берлін карыстаецца вялікім аўтарытэтам на міжнароднай арэне, і нямецкі прагматызм здольны таксама паглыбіць трансатлантычныя дачыненні, што важна для ўсёй Еўропы.

Самыя надзённыя праблемы ў Еўропе

Цэлы шэраг еўрапейскіх праблем неабходна развязваць адначасова. Перш за ўсё, гэта выклікі, звязаныя з велізарнай міграцыйнай плынню. Міграцыя ўзмацніла цэнтрабежныя сілы ў Еўропе і прывяла да росту папулізму і нацыяналізму. Крыніцай міграцыйнага крызісу выступаюць канфлікты ў суседніх рэгіёнах, а таксама дэмаграфічны бум у Афрыцы, які робіць неабходнай падрыхтоўку ўсёабдымнай праграмы для гэтага кантынента.

Другі прыярытэт павінен палягаць у развіцці еўрапейскага супрацоўніцтва ў галіне абароны і супольнай барацьбы з тэрарызмам. Гэта ў інтарэсах кожнага. Трэцяй важнай тэмай з'яўляюцца наступствы нядаўняга сусветнага фінансавага крызісу: рост разрыву паміж багатымі і беднымі ва ўсіх краінах, беспрацоўе сярод моладзі і страта даверу да інстытутаў свабоднай рынкавай эканомікі.

Па-чацвёртае, рэформы павінны быць смелымі, каб зрабіць Еўропу больш канкурэнтаздольнай у зменлівым свеце. Гэта азначае больш маштабныя інвестыцыі ў адукацыю, даследчую дзейнасць, новыя тэхналогіі і іх эфектыўнае ўкараненне.

Не дапусціць з'яўлення новых раздзяляльных ліній

Сёння на карту пастаўлена вельмі многае. Палеміка паміж прыхільнікамі еўрапейскай інтэграцыі, з аднаго боку, і папулістамі і нацыяналістамі - з другога, будзе прадаўжацца і ўзмацняцца. Ад Нямеччыны я чакаю, што яна будзе абараняць адзінства Еўропы і яе фундаментальныя каштоўнасці. І нават калі будучыня за Еўропай розных хуткасцяў, Нямеччына павінна выступаць супраць узнікнення новых бар'ераў, паглыблення раздзяляльных ліній, росту пратэкцыянізму і палітыкі выключэнні.

І напрыканцы - пра Польшчу і Нямеччыну. Я ганаруся тым, што мне пашчасціла быць часткай вялікага праекта нямецка-польскага прымірэння. Пасля 1000 гадоў складанага суседства мы цяпер адзіныя ў ЕЗ і NATO. Мы хаўруснікі. Гэта абавязвае.

Дэмакратыя праходзіць розныя этапы і эпізоды, але дыялог нам патрэбен заўсёды. Сапраўды гэтак жа, як і добрая воля, і разуменне таго, што нават самае цяжкае мінулае не можа засланіць шанцы на будучыню.

Я чакаю, што Нямеччына пасля выбараў прадоўжыць дыялог і супрацоўніцтва ў той атмасферы і на аснове таго, што мы разам стварылі з 1989 года.