І не ў восем, і не ў дзевяць: Што ўсё ж змянілася з 1 верасня ў школах?

Навін для школьнікаў, бацькоў і настаўнікаў 2017-ы навучальны год прынёс - хоць адбаўляй.

Сайт kp.by распавядае пра галоўныя школьныя новаўвядзенні гэтага года:

Пачатак урокаў у кожнай школе свой

У канцы мінулага навучальнага года бацькі школьнікаў актыўна абмяркоўвалі пытанне: ці будуць дзеці вучыцца з 9 раніцы, як прапаноўваў прэзідэнт. Спачатку Мінадукацыі казала, што на новы час працы пераходзіць больш 80% школ, але паводле апошніх звестак, толькі ў 60% школ будуць вучыцца з 9 раніцы. Напрыклад, у некаторых гімназіях, дзе ўрокі пачынаюцца з 8.30 раніцы, бацькі доўга збіралі подпісы і пісалі лісты чыноўнікам, каб час заняткаў пакінулі ранейшым. Старанні апраўдаліся: дзеці вучацца з 8.30. Але ёсць школы, у якіх ўрокі пачынаюцца і не ў 8.30, і не ў 9.

- У мяне двое дзяцей-школьнікаў, - распавядае мама другакласніка і васьмікласніка. - Летась яны разам хадзілі ў школу да 8.00, а цяпер пачаўся нейкі хаос! Расклад у дзяцей не супадае ні ў адзін з дзён. Старэйшы сын тры дні на тыдзень ходзіць да 9 раніцы, адзін дзень - да 8, адзін - да 8.15 праз інфармацыйную і класную гадзіну. У малодшага сына расклад іншы - у яго так званыя нулявыя ўрокі праводзяцца тры разы на тыдзень. Атрымліваецца, трэба абуджаць дзяцей у розны час, хадзіць разам у іх таксама не атрымліваецца...Клопатаў значна больш! Як паводзіць сябе ў гэтай сітуацыі, я пакуль што не разумею. Акрамя таго, старэйшы сын у школе да чатырох гадзін, аб дзённай секцыі па дзюдо давядзецца забыцца.

Вучымся па электронных падручніках, а плацім за друкаваныя

СМІ ўжо пісалі пра тое, што сёлета школьнікі пачынаюць вучыцца паводле новых праграм. Паводле афіцыйнай версіі, іх спрасцілі, дзецям не трэба будзе зазубрываць паняцці, а вучоба будзе практыка-арыентаванай. Але вось падручнікі для новых праграм выпусцілі яшчэ не ўсе. Цалкам абнавіць лінейку абяцаюць толькі да 2019 года. Пакуль што настаўнікам даводзіцца знаходзіць выхад. Напрыклад, 10-класнікі вучаць хімію па кніжках 11-а класа.

А каб заплечнікі школьнікаў не былі такімі цяжкімі, усё больш навучальных устаноў дазваляюць карыстацца электроннымі версіямі, якія можна спампаваць на электронную кнігу або планшэт. Але заплаціць за карыстанне папяровымі кнігамі ўсё адно давядзецца. Самы дарагі камплект сёлета - у сямікласнікаў: 14 падручнікаў абыдуцца 40 рублёў, з улікам датацыі дзяржавы бацькі заплацяць 20 рублёў. Летась сума была амаль удвая меншай.

За харчаванне - ніякай гатоўкі настаўніку

У школах ужо каторы год хочуць адысці ад гатоўкі, якія збіраюць настаўнікі - на абеды, на рамонт, на куплю туалетнай паперы і мыла. Паводле правілаў, цяпер усе зборы павінны быць на рахунак школы. Пакуль што са зборамі на рамонт канкрэтнага класа або куплю той жа туалетнай паперы гэта працуе толькі ў тэорыі. А на практыцы безнаяўныя разлікі з гэтага года цалкам дакладна будуць тычыцца харчавання. Менскія школьнікі цяпер не здаюць класным кіраўнікам гатоўку на абеды, а настаўнікі не вядуць запісы ў сшытках. Бацькі плацяць за школьную ежу праз АРІП у банках або праз інтэрнэт, а класныя кіраўнікі кантралююць гэты працэс. Неўзабаве новаўвядзенне павінна прыйсці і ў рэгіёны. Але ці стане ад гэтага прасцей? Многія настаўнікі мяркуюць, што радавацца рана: яны павінны кожны дзень у кампутарнай сістэме адзначаць школьнікаў: хто на месцы, хто хварэе, хто які комплекс есць, і сачыць за тымі, хто не здае грошы своечасова.

- У нас у школе некалькі кампутараў. З хуткасцю доступу ў інтэрнэт таксама ёсць праблемы. Не разумею, як гэта будзе арганізавана. Плюс ёсць педагогі, якія «на вы» з кампутарам - могуць быць памылкі, - распавядае настаўніца менскай школы. - Нам паабяцалі аплачваць выдаткі на інтэрнэт, калі мы наважым запаўняць сістэму з асабістых кампутараў. Паглядзім, ці будзе так напраўду.

За першы месяц бацькам трэба здаць грошы загадзя, а ўжо пачынаючы з кастрычніка за абеды разлічвацца будуць не пазней за 5 чысло наступнага месяца. Пры гэтым бацькам многіх школ сказалі, што неабавязкова плаціць усю суму за месяц цалкам, «унёскі» можна падзяліць на некалькі частак - галоўнае, не пазней за названую дату.