Пенсіянерам прадаюць «цуда-падпяткі» і паскаральнікі медытацыі касмічнымі коштамі

Скандал пачаўся ў Берасці і распаўсюджваецца далей.

У Берасці разгарэўся не абы-які канфлікт інтарэсаў. Фігуранты: вытворца, распаўсюднік і абураныя пакупнікі. Прадмет спрэчкі - укладышы ў абутак.

Распрацоўшчыкі запэўніваюць: іх інавацыя істотна ўплывае на паляпшэнне здароўя, але пакупнікоў палохалі пасярэднікі, якія завысілі кошт вырабы ў 20 разоў, піша brestcity.com.

Кліенты наракаюць не толькі на высокі кошт, але і метад продажу: набілі аскому прэзентацыі, куды запрашаюць паводле папярэдняму тэлефанаванню. Гісторыя пачалася ў Берасці, але адгалоскі яе ўжо чутныя па ўсёй краіне.

Любоў Марза, 80-гадовая пенсіянерка з Пінска, якая пакутуе другой стадыяй артрозу, ніколі не ўвязвалася ні ў якія авантуры. З берасцейскай кампаніяй ТАА «Трыбунькоф» выйшла інакш. Адказала на званок, пагадзілася пайсці на групавую гутарку па лячэнні суставаў, паслухала пераканаўчых мэнэджараў і заключыла дамову растэрміноўкі на 180 рублёў, купіўшы ўкладышы «Сіла Гермеса», якія павінны былі ёй дапамагчы. Хутка абдумалася, але вярнуць куплю ўжо не змагла.

Цяпер яе дачка Ларыса спрабуе дамагчыся праўды разам з Берасцейскім абласным таварыствам абароны правоў спажыўцоў. Яго старшыня Ірына Маркава кажа пра дзясяткі зваротаў з розных гарадоў. Іванава, Полацк, Горадня, Гомель:

- Амаль усе кліенты - пенсіянеры з цяжкімі захворваннямі. Нам ужо ўдалося выйграць адзін суд па нявызначанаму колу пацярпелых, дзе некаторыя пункты дамоваў, якія парушаюць правы спажыўцоў, былі прызнаныя несапраўднымі. А значыць тыя, хто заключыў дамову з гэтай фірмай, нават не звярнуўшыся да нас, у выпадку спрэчкі з прадаўцом могуць выкарыстоўваць судовую пастанову ў сваіх інтарэсах.

Цяпер ТАА «Трыбунькоф» распаўсюджвае ўкладышы «Сіла Гермеса» ўласнай вытворчасці. А зусім нядаўна яны рэалізоўвалі знешне падобную прадукцыю, распрацаваную берасцейскім ТАА «Навуковы цэнтр «Энергатон».

Яго дырэктар Аляксей Дзямчук і намеснік Рыгор Дземідзюк прыхільнікі нетрадыцыйнай медыцыны. Не маючы навуковых ступеняў і медыцынскай адукацыі, сур'ёзна захапляюцца даследаваннямі старажытных практык.

Пра чакры, патокі інь – ян, біяполе Аляксей Дзямчук распавядае з вялікім энтузіязмам. Гэтак жа, як і пра іх распрацоўкі ў гэтым кірунку, якія атрымалі ў свой час патэнты:

- Спачатку мы прыдумалі прыбор «Логас». Ён працуе на энэргіі чалавека без магнітаў і батарэек. Свайго роду паскаральнік медытацыі. Узялі ў рукі - і ваша энэргія размеркавалася, баланс наступіў. Каб запусціць сістэму цэнтраў, распрацавалі падпятак.

Аляксей запэўнівае: іх інавацыя, якая называецца «Сакрэт Гермеса», можа дапамагчы хвораму ў любым узросце. Пакупнікоў адштурхвае цана ад пасярэдніка, бо першапачаткова, усяго два-тры гады таму, падпяткі каштавалі 4 рублі. Потым павысілі кошт да 8 рублёў.

Гандлявалі, кажа Аляксей, ад выпадку да выпадку, бо іх галоўная мэта - не бізнэс, а даследаванні:

- ТАА «Трибунькоф» заключыла з намі кантракт, паводле якога 1,5 года эксклюзіўнае права продажу належала ім. За год яны ўзнялі цану ў 20 разоў. У канцы мінулага года дамова скончылася, сваю ліцэнзію мы ім не прадалі і да іх прадукцыі («Сіла Гермеса». - А.М.) дачынення не маем.

Сайт ТАА «Трыбунькоф» напоўнены спецыфічнай «аўрай»: электрамагнітныя палі, зараджаныя бакі чалавека, акумуляцыя энэргіі... Пры сустрэчы з журналістамі кіраўнік фірмай, які прадставіўся Дзянісам Гусакоўскім, быў трохі загадкавы.

Казаць што-небудзь на дыктафон адмовіўся адразу, хоць, як правіла, кіраўнік сур'ёзнага прадпрыемства, які адказвае за свае словы, не баіцца каментароў пад запіс.

Сутнасць размовы была такой: тавар - не медпрэпарат, яны яго не навязваюць, у пакупнікоў любога ўзросту ёсць права выбару (браць - не браць). Задаволеных спажыўцоў шмат, зваротаў мала, з дакументацыяй усё ў парадку. Праўда, адкуль распрацоўшчыкі чэрпалі гэткія спецыфічныя веды, я так і не зразумеў. Але дакладна не ў тыбецкіх манахаў.