Арганізатара скачкоў з вышыні ў Соснах прысудзілі да 3 гадоў калоніі

Аляксей Нікітчанка не ўважае сябе за вінаватага.

Суд вынес прысуд індывідуальнаму прадпрымальніку, які арганізаваў скачкі з 70-метровай вышыні ў Соснах, дзе ў чэрвені разбіўся жыхар Салігорска. Аляксей Нікітчанка не ўважае сябе за вінаватага ў загубе маладзёна. Абвінавачаны намагае: тое, што адбылося - няшчасны выпадак. Паводле прысуду ён таксама абавязаны выплаціць 60 тысяч бацьку загінулага роўпджампера і 30 тысяч ягонай роднай сястры, піша tut.by.

У аўторак, 23 студзеня, суд Заводскага раёна Менска абвясціў прысуд 27-гадоваму Аляксею Нікітчанка. Індывідуальнага прадпрымальніка, арганізатара скачкоў з вяроўкі, прызналі вінаватым паводле ч 1 арт 144 (Прычыненне смерці з неасцярожнасці) Крымінальнага кодэкса РБ і прысудзілі да максімальна магчымага пакарання - трох гадоў пазбаўлення волі ў калоніі. На прысуд Аляксей Нікітчанка прыйшоў з заплечнікам - падчас працэсу ён быў на волі.

- Падчас спрэчак адвакат Нікітчанка прасіў яго апраўдаць! Гэта поўны цынізм. Загінуў мой сын, але ніхто не ўважае сябе за вінаватага. Я яшчэ разумею, калі б адвакат казаў пра нейкае мінімальнае пакаранне, але нельга ж так, - каментуе журналістам Аляксандр, бацька загінулага роўпджампера Яўгена Лапановіча.

Акрамя таго, фігурант крымінальнай справы абавязаны выплаціць у якасці маральнай кампэнсацыі бацьку загінулага роўпджампера 60 тысяч рублёў, сястры Яўгена - 30 тысяч і яшчэ маёмасную шкоду - шэсць тысяч рублёў. Падчас судовых пасяджэнняў Нікітчанка заявіў: гэтая сума занадта вялікая, ён гатовы выплаціць толькі 2 тысячы даляраў. Калі пазовы не будуць выплачаныя своечасова, у яго канфіскуюць маёмасць: аўто «Хонда», тэлевізар, рыштунак для скачкоў, квадракоптэр, 250 рублёў, камеру і наручныя гадзіннікі.

Пасля абвяшчэння прысуду родныя загінулага Яўгена Лапановіча плакалі.

- Справядлівасць перамагла, але лягчэй не стала, - заявіў пасля суда Аляксандр Лапановіч.

Нагадаем, 18 чэрвеня 2016 года ў паселішчы Сосны, скачучы з 70-метровай вышыні, Яўген Лапановіч разбіўся на вачах у сваёй нявесты. За некалькі гадзін да трагедыі хлопец зрабіў дзяўчыне прапанову. Ужо падчас судовага разбору высветлілася, што арганізатар скачкоў Нікітчанка не рыхтаваў Яўгена да скачка, не адзеў на яго страховачны пояс, не праводзіў інструктаж, упершыню маладзёна ён убачыў, калі той выйшаў на масток, каб здзейсніць скачок. У судзе Заводскага раёна Менска было дапытана 25 сведак, двое з іх былі засакрэчанымі. Іх дапытвалі праз скайп, змяніўшы голас і не паказваючы твары. Жонка Нікітчанка, якая 18 чэрвеня асабіста рыхтавала Яўгена Лапановіча да скачка, ад дачы сведчанняў адмовілася. Напярэдадні суда пара распісалася, і жонка скарысталася правам не сведчыць супраць блізкага ёй чалавека.

13 студзеня бацька загінулага роўпджампера звярнуўся з заявай да пракурора горада Менска. Ён прасіў перакваліфікаваць справу з ч 1 арт 144 КК «Прычыненне смерці з неасцярожнасці» на артыкул 338 КК «Выкананне работ або выкананне паслуг, якія не адпавядаюць патрабаванням бяспекі, якія пацягнулі з неасцярожнасці смерць чалавека». Яна прадугледжвае больш суровае пакаранне - да сямі гадоў калоніі. Аднак дзяржабвінаваўца не стаў мяняць выстаўленае абвінавачанне.

Прысуд не ўвайшоў у законнае дзеянне і можа быць абскарджаны.