Патрыёт Андрэй Бяляўскі: Немагчыма прадказаць, якую пастанову прыме суддзя

Андрэй Бяляўскі спадзяецца, што на «судзе за патрон» улічаць ягоны арышт паводле «справы патрыётаў».

Крымінальная справа аб захоўванні баявога патрона, заведзеная ў снежні мінулага года на былога фігуранта «справы патрыётаў» Андрэя Бяляўскага, перададзеная ў Ленінскі раённы суд Менска.

Як распавёў «Радыё Свабода» Андрэй Бяляўскі, пра дату судовага працэсу яму яшчэ не паведамілі. Пры гэтым патрыёт сказаў, што спадзяецца на станоўчы для сябе прысуд:

«Немагчыма прадказаць, якую пастанову прыме суддзя, але спадзяюся, што ён улічыць мой арышт паводле «справы патрыётаў», - сказаў Андрэй Бяляўскі.

Нагадаем, баявы патрон ад аўтамата Калашнікава быў знойдзены сярод рэчаў Андрэя Бяляўскага падчас ператрусу пасля ягонага затрымання ў сакавіку 2017 года ў «справе патрыётаў».

На следстве Бяляўскі паведаміў, што захоўваў патрон у якасці сувеніра. Паводле артыкула аб незаконным абарачэнні зброі Бяляўскаму пагражаюць папраўчыя работы, арышт да трох месяцаў альбо да 7 гадоў пазбаўлення волі.

Андрэй Бяляўскі прабыў пад арыштам 2,5 месяцы.