Дзярждэп ЗША: Другі этап санкцый супраць РФ будзе больш жорсткім

Цяпер вядзецца актыўная праца над новым раўндам санкцый.

Памочнік дзяржсакратара ЗША ў пытаннях міжнароднай бяспекі і нераспаўсюджвання Крыстафер Форд заявіў, што другі этап санкцый супраць Расеі ў сувязі з атручваннем у брытанскім Салсбэры экс-палкоўніка ГРУ Сяргея Скрыпаля і ягонай дачкі будзе "больш жосткім", чым першы, паведамляе nv.ua.

Падчас выступу ў фондзе Heritage Форд распавёў, цяпер Дзярждэп вядзе актыўную працу над новым раўндам санкцый.

"І чым больш драконаўскія варыянты ёсць у спісе, тым больш асцярожна трэба ўзважваць за і супраць, рызыкі", - сказаў ён.

Нагадаем, 8 жніўня ЗША прынялі пастанову ўвесці супраць Расеі новыя санкцыі праз атакі з выкарыстаннем нервова-паралітычнага рэчывы Навічок супраць былога расейскага выведчыка Сяргея Скрыпаля і ягонай дачкі ў Вялікабрытаніі.

У заяве Вашынгтон наўпрост абвінаваціў Маскву ў выкарыстанні забароненай хімічнай зброі супраць грамадзяніна Брытаніі Сяргея Скрыпаля і ягонай дачкі Юліі. Санкцыі ўвайшлі ў дзеянне 22 жніўня.

Акрамя таго, калі цягам трох месяцаў Масква не дасць гарантый, што не будзе выкарыстоўваць хімічную зброю і не пагодзіцца на допуск міжнародных інспектараў, увойдзе ў дзеянне другі этап санкцый, які прадугледжвае зніжэнне ўзроўню дыпламатычных стасункаў, скарачэнне да мінімуму ўзаемнага гандлю і забарону палёту ў ЗША для расейскіх авіяліній.

Амерыканскія абмежавальныя меры могуць ахапіць 70% расейскай эканомікі і 40% працоўнай сілы.

У Дзяржаўным дэпартаменце ЗША заявілі, што ў лістападзе будзе ўведзены "вельмі жорсткі" другі пакет санкцый.

Пасольства Расеі ў ЗША заявіла, што гэтыя санкцыі з'яўляюцца "драконаўскімі", а прычыны іх увядзення "надуманыя". У МЗС РФ заявілі, што Масква не будзе выконваць пастаўленыя ЗША ўмовы для зняцця новых санкцый і зоймецца прапрацоўкай захадаў у адказ на новыя санкцыі ЗША.

Прэм'ер-міністр Расеі Дзмітрый Мядзведзеў заявіў, што магчымае далейшае ўзмацненне амерыканскіх санкцый супраць Расеі можна будзе расцаніць як абвяшчэнне эканамічнай вайны.

4 сакавіка 2018 года былога расейскага агента Сяргея Скрыпаля і ягоную дачку Юлію атруцілі нервова-паралітычным рэчывам Навічок у брытанскім Салсбэры. Са звестак Лондана, за атручваннем Скрыпалёў стаіць Расея, а выканаўцамі злачынствы былі афіцэры ГРУ. Масква адмаўляе абвінавачванні.