Беларусаў вярбуюць у расейскае войска

Міністэрстве абароны Беларусі ведае пра вярбоўку нашых грамадзян у войска РФ.

У Пскове вярбуюць беларусаў на службу ў расейскае войска.

«Увага: тэрмінова патрабуюцца ў пункт адбору на вайсковую службу паводле кантракта ў УС Расейскай Федэрацыі грамадзяне, якія пражываюць на тэрыторыі Рэспублікі Беларусь», - так пачынаецца e-mail, рассыланы пунктам адбору на вайсковай службу паводле кантракце РФ Пскоўскай вобласці (ПАВСК).

Уладкавацца можна кіроўцам, стралком, артылерыстам. Кантрактнікам абяцаюць заробак ад 300 да 1000 даляраў, поўнае забеспячэнне, службовае жыллё.

«Грамадзяне, якія жывуць на тэрыторыі Рэспублікі Беларусь» - фармулёўка абцякальная. Гаворка можа ісці ў тым ліку і пра расейцаў, якія абжыліся ў нашай краіне. Але і грамадзяне Беларусі пад гэтае апісанне падыходзяць. Ці законна ўладкоўвацца на такую працу, і ці не будзе такая служба па кантракце ў войску суседняй краіны лічыцца наёмніцтвам?

«Гаворка ідзе пра вайсковую службу па кантракце ва ўзброеных сілах Расейскай Федэрацыі, - распавядаюць «Еўрарадыё» ў пункце адбору. - Разглядаем кандыдатаў ва ўзросце ад 18 да 40 гадоў. Вакансіі разлічаны на тых, хто праходзіў вайсковую службу па прызыву.

Калі грамадзянін не служыў, у яго павінна быць закончаная вышэйшая або сярэдняя прафесійная адукацыя. Службу можна праходзіць і ў Пскове, і ў Пскоўскай вобласці, і за яе межамі. Геаграфія шырокая, як і наша краіна».

- А ў гарачую мясцовасць могуць паслаць?

- Па жаданню. Па-першае, каб туды трапіць, трэба ўкласці кантракт. Цяпер проста так каго патрапіла не адпраўляюць. А як вы даведаліся пра вакансіі? Вам прыйшоў e-mail?

- Не. Мы з Беларусі, знаёмым прыйшоў ліст, а яны нам распавялі.

- Вы ўжо не першыя, хто тэлефануе [з Беларусі]. Не ведаю, хто канкрэтна адпраўляў інфармацыю, можа быць, сервер. Замежныя грамадзяне, якія выказалі жаданне праходзіць вайсковую службу паводле кантракта ва ўзброеных сілах РФ, могуць заключыць адзіны кантракт на пяць гадоў. Кандыдату павінна быць ад 18 да 30 гадоў. У Баранавічах, дарэчы, ёсць наша воінская мотастралковая частка. Нават там патрабаваліся кіроўцы. Яшчэ ў Ленінградскай вобласці (горад Луга), Калінінградскай, Белгарадскай...

- А гэта не будзе лічыцца наёмніцтвам?

- Хм... Не гатовы адказаць, ці ёсць у Беларусі артыкул аб наёмніцтве [шукае. - Заўвага.]... Ну, так. «Наёмніцтва» - артыкул 133 КК Рэспублікі Беларусь. Але тут ён трактуецца як «удзел на тэрыторыі замежнай дзяржавы ва ўзброеных канфліктах, вайсковых дзеяннях асобы, якая не ўваходзіць у склад узброеных сіл ваюючых бакоў». Так што на службу ў замежных дзяржавах гэта не распаўсюджваецца. Там толькі пра ўдзел у вайсковым канфлікце ў складзе прыватных прадпрыемстваў, арганізацый і гэтак далей. Адзінае, пры працаўладкаванні ў Расеі як замежнага грамадзяніна, вы сутыкнецеся з шэрагам адміністрацыйных працэдур. Трэба, напрыклад, атрымаць права на жыхарства, ну і іншыя дазволы. Давядзецца звярнуцца ў міграцыйную службу.

Мінабароны: Выразна вызначана, дзе беларусам трэба праходзіць вайсковую службу. Дакладна не ў замежным войску, і нават не ў войску брацкай Расеі

У Міністэрстве абароны Беларусі Еўрарадыё адказваюць, што бачылі вярбовачны ліст, пра які ідзе гаворка. Начальнік упраўлення інфармацыі Уладзімір Макараў раіць нам уважліва чытаць «паведамленні, штораспаўсюджваюцца невядома кім», і ў выпадку сумневаў звяртацца па каментары ў кампетэнтныя органы Расейскай Федэрацыі.

Мы задаём пытанне аб тым, ці можна грамадзянам Беларусі служыць у расейскім войску па кантракце.

«У гэтым так званым звароце асабіста я ўбачыў некалькі супярэчнасцяў, якія не адпавядаюць расейскім федэральным законам, - кажа Уладзімір Мацвеевіч, хоць і не тлумачыць, пра якія менавіта супярэчнасці ідзе гаворка. - Што тычыцца нашага заканадаўства, грамадзяне Рэспублікі Беларусь, якія праходзяць вайсковую службу ва Узброеных сілах Рэспублікі Беларусь, не могуць служыць у іншых войсках па азначэнні. І не служаць. Вось і ўсё. З нагоды тых, хто наогул не праходзіў вайсковую службу, глядзіце «Закон аб воінскім абавязку і воінскай службе». У ім выразна вызначана, дзе беларусам трэба праходзіць вайсковую службу, або тэрміновую вайсковую службу, або ў рэзерве i гэтак далей. Дакладна не ў замежным войску. Нават не ў войску брацкай Расеі».