СМІ: «Раснафта» адмовілася ад працы ў Іране праз санкцыі ЗША

Раней расейцы падпісалі кантракт з Іранскай нацыянальнай нафтавай кампаніяй.

«Раснафта» адмовілася ад працы ў Іране праз амерыканскія санкцыі ў дачыненні да Тэгерана. Пра гэта пішуць «Ведомости» са спасылкай на крыніцы ў расейскай дзяржаўнай кампаніі.

У канцы 2017 года «Раснафта» і Іранская нацыянальная нафтавая кампанія падпісалі дарожную карту для рэалізацыі стратэгічных праектаў. Тады ж кіраўнік «Раснафты» Ігар Сечын казаў, што інвестыцыі ў іх могуць скласці да 30 мільярдаў даляраў. Аднак, са слоў адной з крыніц газеты, перамовы былі спыненыя летам 2018 гадоў у сувязі з пагрозай увядзення ЗША санкцый у дачыненні да Ірана. У выніку яны былі ўведзеныя 6 лістапада і сярод іншага ўключалі эмбарга на імпарт іранскай нафты.

Іншы суразмоўца выдання адзначае, што яшчэ адной прычынай сыходу з Ірана стала змена стратэгіі «Раснафты», якая засяродзілася на росце ўнутры Расеі. Яшчэ адна крыніца «Ведомостей» дадала, што абавязацельстваў перад іранскім бокам у «Раснафты» не было, грошай дзяржкампанія не ўкладвала, і страт не будзе. Каментароў «Раснафты» і Іранскай нацыянальнай нафтавай кампаніі газета не мае.

Амерыканскія санкцыі супраць Ірана, якія ўвайшлі ў дзеянне 6 лістапада, датычацца розных сектараў іранскай эканомікі, у тым ліку банкаў і нафтаздабываючых кампаній. Гэтыя захады былі ўведзеныя праз паўгода пасля выхаду Вашынгтона са шматбаковай «ядзернай угоды» з Тэгеранам. З гэтай пастановай не згодныя Еўразвяз, Расея і Кітай. Улады ЕЗ абвясцілі аб распрацоўцы схемы абыходу захадаў у дачыненні да Ірана з боку ЗША.