Расея абвясціла дыпламата Славаччыны персонай нон-грата
- 13.12.2018, 11:21
- 8,187
Вайсковага дыпламата вышлюць з РФ.
Расея абвясціла вайсковага дыпламата Славаччыны персонай нон-грата, яго вышлюць з краіны, паведамляе «Дождь» са спасылкай на «Інтэрфакс».
Такую пастанову ў МЗС прынялі ў адказ на высылку расейскага дыпламата са Славаччыны, якая адбылася ў канцы лістапада.
Імя славацкага дыпламата не называецца. МЗС Расеі назвала дзеянні Славаччыны «недружалюбным крокам».
Расейскага дыпламата выслалі з краіны ў канцы лістапада, аднак пра гэта стала вядома толькі ў пачатку снежня. Імя дыпламата не называлася. Прычынай высылкі прэм'ер-міністр Славаччыны Петэр Пелегрыні назваў падазрэнні ў шпіянажы.
Мясцовыя СМІ пісалі, што дыпламата выслалі праз збор сакрэтнай інфармацыі аб Славаччыне і NATO.
У лістападзе ў Аўстрыі затрымалі 70-гадовага палкоўніка ў адстаўцы, якога западозрылі ў шпіянажы на карысць Расеі. Паводле версіі следства, ён быў завербаваны савецкімі спецслужбамі ў 1988 годзе. Падазраванага не сталі арыштоўваць і адпусцілі пад абавязацельства не кантактаваць з вайскоўцамі.