МУС дасць Мінпрацы звесткі пра «дармаедаў»

З рэгістра насельніцтва могуць выключыць інфармацыю аб статусе працоўнага, беспрацоўнага і непрацоўнага.

Пра гэта сёння ў «парламенце» заявіў міністр унутраных спраў Ігар Шуневіч, агучваючы змены ў Закон «Аб рэгістры насельніцтва». Згодна з прапанаванымі зменамі, у базе па-ранейшаму будзе ўтрымлівацца толькі інфармацыя пра занятае ў эканоміцы насельніцтва — месцы працы, дата працаўладкавання і звальнення, а таксама аб даце пастаноўкі на ўлік і зняццё з уліку ў якасці беспрацоўнага, піша tut.by.

Якая інфармацыя ёсць у рэгістры насельніцтва?

Рэгістр насельніцтва — цэнтралізаваная аўтаматызаваная інфармацыйная сістэма, у ёй утрымліваюцца персанальныя звесткі беларусаў, а таксама замежнікаў, якія ўвесь час пражываюць у нашай краіне. Рэгістр ствараўся для «абароны правоў і свабод фізічных асоб, а таксама фарсавання адзінай інфармацыйнай прасторы», удакладняюць у МУС. Адная з задач сістэмы — «аператыўнае забеспячэнне дакладнымі і актуальнымі персанальнымі звесткамі дзяржорганаў, іншых арганізацый, натарыусаў і фізічных асоб».

Акрамя імя і прозвішча, даты нараджэння, полу, звестак аб рэгістрацыі на месцы жыхарства, у рэгістры таксама паказваюць ідэнтыфікацыйны нумар, сямейнае становішча, інфармацыю пра блізкіх (бацькоў, жонку, дзяцей), аб выкананні вайсковага абавязку, а таксама звесткі пра род заняткаў — месца працы, дата працаўладкавання і звальнення.

Фізічныя асобы могуць адзін раз за каляндарны год запытваць выпіску з рэгістра са сваімі персанальнымі звесткамі або інфармацыяй пра фізічную асобу, законным прадстаўніком якіх з'яўляецца. Наступныя выпіскі цягам года будуць платнымі — адна базавая адзінка (24,5 рубля).

У рэгістры насельніцтва сёння таксама павінна ўтрымлівацца інфармацыя аб статусе працоўнага, беспрацоўнага, непрацоўнага, паказаная дата пастаноўкі і зняцця з уліку ў цэнтрах занятасці. Аднак на практыцы ў базе няма звестак аб непрацоўых (якія не стаяць на ўліку ў цэнтрах занятасці), прынамсі, поўных і сістэматызаваных. У гэтай сітуацыі МУС прапануе выключыць з рэгістра насельніцтва інфармацыю аб статусе працоўнага, беспрацоўнага і непрацоўнага.

Гэта прапанова выклікала сёння пры абмеркаванні ў парламенце нямала пытанняў з боку дэпутатаў. Так, «дэпутатка» Вольга Палітыка звярнула ўвагу на тое, што «за 10 гадоў існавання закона так і не ўдалося ні вызначыцца з гэтымі тэрмінамі (статус, які працуе, беспрацоўны, непрацоўны. — заўвага рэд.), ні з механізмам унясення гэтых звестак».

— Але цяпер вядзецца праца для рэалізацыі норм дэкрэта №3, там ўведзена тры новыя тэрміны, сугучныя з тымі, якія мы спрабуем выключыць. А менавіта: занятыя ў эканоміцы, працаздольныя грамадзяне, якія не занятыя ў эканоміцы, і грамадзяне, якія не належаць да працаздольных грамадзян, якія не занятыя ў эканоміцы, — удакладніла «дэпутатка». — Больш таго, фармаванне базы працаздольных грамадзян, якія не занятыя ў эканоміцы, прадугледжвае, што ўсе жыхары нашай краіны, старэйшыя за 18 гадоў, павінны быць ідэнтыфікаваныя і залічаныя да адной з катэгорый прычым на падставе першасных звестак. Дык, можа, не трэба адмаўляцца і ўсё ж змяніць гэтыя тэрміны на тыя, якія прадугледжаныя дэкрэтам №3, і весці гэты ўлік?

Ігар Шуневіч адзначыў, што ў Беларусі дагэтуль не могуць вызначыць статус непрацоўных грамадзян.

— З ініцыятывы МУС у 2015 годзе Мінпрацы і сацабароны ва ўзаемадзеянні з іншымі ўстановамі вывучалася гэтае пытанне пра статус, і аналіз паказаў, што мясцовыя выканаўчыя органы ўлады не маюць інфармацыі, якая дазваляе вызначыць гэты статус. Гэта першае, — адзначыў Ігар Шуневіч. — І другое — тое, што сёння няма дакладных крытэрыяў і паняццяў, што такое непрацоўны, і, як вынік, адпаведныя інфармацыйныя ўлікі не вяліся і не вядуцца, сёння няма назапашанай базы. Мы мяркуем, што ў гэтай сітуацыі такі парадак новага ўліку з усімі наступствамі залішні і эканамічна неапраўданы, на сёння не мае такой вострай патрэбы.

Але калі «дэпутаты» будуць намагаць на тым, каб ўносілі ў рэгістр гэтыя звесткі, то трэба будзе «рабіць рэспубліканскі ўлік, адпаведную новую базу звестак і ўлічваць гэта, уводзіць новую тэрміналогію і напаўняць яе гэтай інфармацыяй», дадаў кіраўнік МУС.

— А потым хтосьці неяк будзе гэта ўлічваць, хто і як, на нашую думку, сёння гэта пытанне дыскусійнае і для чаго, уласна кажучы, — адзначыў Ігар Шуневіч.

Нагадаем, раней урад вызначыў, хто будзе падпадаць пад дзеянне абноўленага дакумента аб дармаедсте — дэкрэта №1. Адпаведная пастанова замацаваная пастановай урада ад 31 сакавіка 2018 года №239. Займацца фармаваннем базы працаздольных грамадзян, якія не занятыя ў эканоміцы, будзе Мінпрацы. Яна павінна быць падрыхтаваная да 1 снежня гэтага года.

Пры гэтым МУС, згодна з пастановай урада ў развіцці дармаедскага дэкрэта, павінна будзе падаваць у Міністэрства працы ў адпаведнасці з электроннымі запытамі інфармацыю аб грамадзянах, ідэнтыфікацыйныя нумары якіх уключаныя ў базу звестак працаздольных грамадзян, якія не занятыя ў эканоміцы. Прасцей кажучы, звесткі пра тых беларусаў, якія трапілі ў спіс дармаедаў. МУС будзе даваць гэтую інфармацыю раз на паўгоддзе. Сярод звестак — імя і прозвішча, дата нараджэння, пол, грамадзянства, звесткі аб рэгістрацыі на месцы жыхарства (месца знаходжання), тып, серыя і нумар дакумента, які пацвярджае асобу).

З 1 студзеня 2022 года МУС будзе падаваць у Мінпрацы гэтую інфармацыю праз агульнадзяржаўную аўтаматызаваную інфармацыйную сістэму.