Каб аспрэчыць пастанову ДАІ, магілёўскаму актывісту трэба адправіцца ў будучыню
2- 25.04.2018, 11:30
- 10,637
Матывавальную частка да пастановы пра штраф Станіславу Паўлінковічу даслалі са жнівеньскай датай.
Актывіста Станіслава Паўлінковіча затрымалі ў Магілёве за дзень да менскай акцыі пратэсту, прымеркаванай да Дня Волі, на якую ён збіраўся, паведамляе магілёўская «Вясна».
Паводле ягоных слоў, 24 красавіка ён выйшаў у краму «Гарадок», але дайсці да яе не змог. Супрацоўнікі міліцыі спынілі яго, сказалі, што ён падобны да чалавека ў вышуку, пасля чаго адвезлі ў Ленінскі РАУС. Ужо там на Паўлінковіча склалі пратакол за тое, што ён у неналежным месцы перайшоў дарогу. Хоць, як адзначыў Станіслаў, ён рухаўся толькі ходнікам.
За парушэнне яму далі штраф дзве базавыя адзінкі, прычым супрацоўнікі ДАІ прыехалі для гэтага адмыслова ў ізалятар часовага ўтрымання, у якім Паўлінковіч чакаў суду паводле яшчэ адной адміністрацыйнай справе - за непадпарадкаванне міліцыі. Пасля ён атрымаў за гэта яшчэ адзін штраф.
Магілёўскія праваабаронцы прызналі пераслед актывіста палітычна матываваным і дапамаглі яму з абскарджаннем абодвух пастаноў.
Каб аспрэчыць пастанову ДАІ, Паўлінковіч запатрабаваў выдаць яму матывавальную частку. Намеснік начальніка міжраённага аддзела ДАІ УУС Магаблвыканкама пагадзіўся і выслаў актывісту дакумент разам з суправаджальным лістом. Згодна з паперай, матывавальную частку Паўлінковіч атрымаў 6 жніўня 2018 года.
- Цяпер нам трэба будаваць машыну часу, каб абскардзіць пастанову ДАІ, - смяецца праваабаронца Барыс Бухель. Паводле ягоных слоў, памылка з'яўляецца дастаткова сур'ёзнай:
- У самой матывавальнай частцы ніякай даты не стаіць. Яна ёсць толькі ў суправаджальным лісце. Рэч у тым, што на абскарджанне ў нас ёсць дзесяць дзён з моманту атрымання. Улічваючы, што атрымалі мы яе ў красавіку, а там паказаны жнівень месяц, незразумела, як гэта наогул можна абскардзіць.
Акрамя гэтага праваабаронцу турбуе, што не пазначаная дата ў самой матывавальнай частцы:
- Згодна з дзейнай інструкцыяй Міністэрства юстыцыі ў справаводстве, у дакуменце заўсёды павінен быць подпіс, расшыфроўка, дата. Без гэтага папера юрыдычнай сілы не мае.
Што ў такім выпадку застаецца рабіць?
- Давядзецца пісаць скаргі на парушэнне ДАІ інструкцыі справаводства ў пракуратуру і вышэйшаму начальству, - сказаў Бухель.