У Менску брыгада страхароў у знак пратэсту пакінула суд

Работнікі праз суд патрабуюць спагнаць з будаўнічага трэсту «Белтрансбуд» больш за $40 тысяч.

14 пазоўнікаў дружна пакінулі залу судовага пасяджэння, пасля таго як суддзя суда Маскоўскага раёна Мінска Святлана Смоліна адхіліла хадайніцтва аб правядзенні почыркавай экспэртызы подпісаў на дамовах найму, паведамляе сайт praca-by.info.

За чатыры судовыя паседжанні суд не даў адказу на аніводнае пытанне пазоўнікаў.

Брыгада страхароў, якая ўступіла ў прафзвяз РЭП, патрабуе спагнаць з будаўнічага трэста «Белтрансбуд» запазычанасць за выкананыя работы паводле дамоваў найму, выкананыя ў кастрычніку 2017 года – студзені 2018 года. Адказчык завінаваціўся рабочым больш за 83 тысячы рублёў, але прызнае запазычанасць толькі на 10 тысяч рублёў. На адным з папярэдніх пасяджэнняў начальнік юрыдычнага аддзела будаўнічага «Трэста Белтрансбуд» Аляксей Паведзянок сцвярджаў, што агульная сума запазычанасці перад страхарамі складае 5,5 тысячы рублёў.

Падчас судовага працэсу аб спагнанні ўзнагароджання за дахавыя працы да ААТ «Трэст Белтрансбуд» брыгадзір Сяргей Вячэрскі заявіў хадайніцтва пра правядзенне почырказнаўчай экспэртызы шэрагу дакументаў. Гаворка ідзе аб дамовах найму за лістапад 2017 года, прадстаўленых суду адказчыкам, пад якімі нібыта стаяць «подпісы» працоўных. Праблема ў тым, што 14 пазоўнікаў, якія прысутнічалі ў судовым пасяджэнні, заявілі, што іх подпісы сфальсіфікаваныя.

Экспэртыза не выкліканая неабходнасцю?

24 красавіка суддзя Святлана Смоліна адхіліла хадайніцтва пазоўнікаў, заявіўшы, што прызначэнне экспэртызы не выкліканае неабходнасцю. Прадстаўнік пазоўнікаў Юрый Белякоў, прававы інспектар прафзвязу РЭП, некалькі разоў пытаўся, які сэнс схаваны ў гэтай фразе, але адказу не атрымаў. У знак пратэсту супраць пазіцыі суддзі страхары пакінулі залу судовых пасяджэнняў.

– Сапраўды правядзенне почырказнаўчай экспэртызы не выкліканае неабходнасцю? У матэрыялах справы ёсць дамовы найму і акты выкананых работ, прадстаўленыя суду адказчыкам. Дакументы падпісаныя наймальнікам і выканаўцам. Але вось закавыка: ні адзін з чатырнаццаці страхароў, якія прысутнічалі ў зале суда, не прызнаў свой подпіс – усе падпісаныя чужой рукой. У справе прысутнічаюць таксама копіі дамоваў найму, якія падалі страхары, з подпісамі саміх пазоўнікаў і брыгадзіра. У дамовах першапачатковыя сумы замазаныя і па-над імі пастаўленыя новыя, – патлумачыў прараб Барыс Варанкоў.

– Праблема ў тым, што сумы за выкананыя работы ў дамовах найму, прадстаўленыя адказчыкам і страхарамі, адрозніваюцца ў разы. Больш таго, у распараджэнні суда апынуліся аднолькавыя дамовы найму, падпісаныя былым начальнікам філіяла Генадзем Гарадавенкам, аб выкананых работах за канкрэтны месяц, але з рознымі сумамі. Патлумачыць паходжанне падвойных дамоваў адказчык у судзе не здолеў. Фактычна паўстала пытанне аб падробцы подпісаў з боку наймальніка, – дадаў пазоўнік.

Раней 24 красавіка Святлана Смоліна адхіліла хадайніцтва Юрася Белякова аб запатрабаванні выпісак па карт-рахунках аб прыходзе на баланс грашовых сродкаў – дакументы аб пералічэнні наймальнікам грашовых сродкаў, якія дапамаглі б устанавіць суму запазычанасці Трэста Белтрансбуд».

– Быццам бы ў судовым працэсе пазоўнік і адказчык маюць роўныя правы, але мы, выяўляецца, наогул ніякіх правоў не маем. Наш сыход з залы суда – пратэст супраць таго, што творыць суддзя, – абураны Сяргей Вячэрскі.

«На падставе чаго Смоліна збіралася выносіць пастанову?»

25 красавіка брыгадзір страхароў Сяргей Вячэрскі, страхар Уладзімір Седлюкоўскі і юрыст РЭП Юрый Белякоў накіравалі скаргу на дзеянні суддзі на адрас Лукашэнкі, міністра юстыцыі, старшыні Менскага гарадскога суда, старшыні Вярхоўнага суда, старшыні Маскоўскага раённага суда.

Аўтары скаргі сцвярджаюць, што суддзя Святлана Смоліна пазбавіла рабочых «магчымасці абароны сваіх інтарэсаў у добрасумленным судовым разглядзе».

«Усе дакументы, якія знаходзяцца ў матэрыялах справы, належным чынам не завераныя і практычна цалкам сфальсіфікаваныя, - гаворыцца ў скарзе. – Суддзя, ведаючы пра гэта, не выдала ні аднаго дакумента, каб спыніць парушэнне закона і тым самым дыскрэдытуе званне суддзі і спрыяе ўчыненню злачынстваў супраць ажыццяўлення правасуддзя і пакідае відавочныя злачынствы, прадугледжаныя арт. 380,395 КК без наступстваў (фальсіфікацыя доказаў і падробка дакументаў..

Суддзя Святлана Смоліна не высветліла ўсіх абставінаў справы. Пазоўнікі, гаворыцца ў скарзе, пазбаўленыя права «...прадстаўляць довады, удзельнічаць у даследаванні довадаў, задаваць пытанні іншым удзельнікам судаводства ў справе, даваць вусныя і пісьмовыя тлумачэнні суду, прадстаўляць свае довады і меркаванні, а таксама здзяйсняць іншыя працэсуальныя дзеянні, ДПК».

«Суддзя ў гэтым выпадку кіравалася не законам, а асабістымі матывамі і на гэта накіраваныя яе дзеянні і пастановы! Таксама ў матэрыялах справы няма ніводнага пратакола судовага пасяджэння з 4-х мінулых пасяджэнняў! На падставе чаго Смоліна збіралася выносіць пастанову?», - задаюцца рытарычным пытаннем аўтары скаргі.

Падпісанты просяць распачаць дысцыплінарную справу і ўжыць захады дысцыплінарнага ўздзеяння ў дачыненні да суддзі Святланы Смолінай.