Што будзе з далярам найбліжэйшым часам?

Курс даляра ў Беларусі найбліжэйшым часам наўрад ці здолее замацавацца ніжэй за адзнаку 2 рублі.

Жанна Кулакова, фінансавая кансультантка кампаніі «ТелеТрэйдБел», тлумачыць kp.by, што адбывалася з валютамі на мінулым тыдні, і дае прагноз на наступны тыдзень.

- Беларускі рубель ізноў умацоўваецца. За апошні тыдзень курс даляра ў Беларусі вырас на 0,1% да 2,0022, еўра патаннеў на 2% да 2,3483, а курс расейскага рубля знізіўся на 1,1% да 3,2031. У цэлым да кошыку нацыянальная валюта ўмацавалася на 0,9%.

На валютным рынку Расеі за апошні тыдзень прыкметных зменаў не адбылося: на фоне дарагой нафты (а барэль Brent на мінулым тыдні даходзіў да адзнакі 80 даляраў) расейскі рубель захоўвае стабільнасць. З улікам гэтага можна меркаваць, што ўмацаванне беларускага рубля звязана ў тым ліку і з унутранымі фактарамі - відавочна, на біржы захаваецца лішак замежнай валюты. Гэта пацвярджае і статыстыка Нацыянальнага банка.

Тым не менш курс даляра ў Беларусі найбліжэйшым часам наўрад ці здолее замацавацца ніжэй адзнакі 2 рублі. Звязана гэта, па-першае, з тым, што наш рынак яшчэ не да канца адыграў паслабленне расейскага рубля пасля ўвядзення антырасейскіх санкцый, а па-другое, з тым, што амерыканская валюта ўмацоўваецца на міжнародным рынку. На фоне зніжэння геапалітычных рызык і пазітыўных чаканняў адносна перспектыў амерыканскай эканомікі курс даляра на сусветнай арэне абнавіў максімум з пачатку 2018 года. Не выключана, што даляр найбліжэйшым часам будзе заставацца дарагім, у тым ліку і на беларускім рынку. Аднак у другім паўгоддзі еўра можа аднавіць рост супраць даляра праз магчымае ўзмацненне жорсткасці грашова-крэдытнай палітыкі Еўрапейскага цэнтрабанка.

На гэтым тыдні расейскі рубель мае шанцы ўмацавацца на фоне чарговага падатковага перыяду і агульнай «перапрададзенасць» рубля - ёсць прыкметы таго, што цяпер расейская валюта больш слабая, чым павінна быць, зыходзячы з рэальнага становішча спраў у эканоміцы Расеі. Рост курсу расейскага рубля імаверны і на нашым рынку. А даляр і еўра найбліжэйшыя дні могуць заставацца стабільнымі, калі абыдзецца без геапалітычных форс-мажораў.