Крызіс у «вертыкалі»
7- 22.05.2018, 10:13
- 12,746
Менгарвыканкам шукае супрацоўнікаў «з вуліцы».
На сайце Менгарвыканкама з'явілася інфармацыя аб правядзенні адкрытага конкурсу на пасаду намесніка кіраўніка Кастрычніцкага раёна, які курыруе ЖКГ.
Сярод патрабаванняў да кандыдата - практычны досвед і стаж кіроўнай работы ў сферы жыллёва-камунальнай гаспадаркі не менш за 5 гадоў, адказнасць, стрэсаўстойлівасць і ўменне працаваць у камандзе.
Суразмоўца tut.by у дзяржорганах распавёў, што адкрытыя вакансіі нават на высокія пасады ў гарадской вертыкалі - не новая практыка. Паводле ягоных слоў, калі інфармацыю аб вакансіі не публікуюць на сайце, то яна ў кожным выпадку перадаецца ў адкрыты доступ на біржу працы.
Крыніца, якая не назвала сваё імя, заявіла, што гэта звязана з прынцыпам адкрытай эканомікі. Прэтэндаваць на вакансію могуць і людзі без досведу дзяржаўнай службы. У выпадку паспяховага праходжання гутаркі кандыдату давядзецца здаць экзамен.
Няўжо ў Менгарвыканкам на высокую пасаду могуць трапіць людзі без досведу дзяржаўнай службы?
Кіраўнік праекта «Кошт урада» Уладзімір Кавалкін у экспрэс-каментары «Салідарнасці» адзначае, што на дзяржаўную службу трапляюць людзі з кадравага рэзерву выканкама.
- Яны абавязаныя праводзіць унутраны конкурс на замяшчэнне вакансіі. З кадравай сістэмы, якая называецца «Рэзерв», падбіраюць 2-3 кандыдаты. Потым ужо з іх выбіраюць таго, каго ўважаюць за патрэбнага, - тлумачыць экспэрт. - Магчыма, нефармальна ў некаторых выпадках могуць і на біржу працы запыт адправіць, але тое, што яны возьмуць каго-небудзь з біржы працы - шанец проста смешны.
- Магчыма, пошук кандыдатаў на сайце Менгарвыканкама кажа пра тое, што ў сферы дзяржкіравання крызіс, і няма ахвотных працаваць на гэтай пасадзе?
- Чыноўнікі ў нас людзі прымусовыя, яны не вельмі выбіраюць. І калі прапануюць, то, хутчэй за ўсё чалавек пагодзіцца.
Уладзімір Кавалкін мяркуе, што размяшчэнне вакансіі на сайце выканкама не звязана з прынцыпам адкрытай эканомікі, як запэўнівала крыніца ў дзяржаўных органах.
- Гэта сістэма дзяржаўнай службы. Ёсць сістэма пасад і ёсць сістэма кар'ерная. У нас сістэма змяшаная. Яна мае на ўвазе, што людзі трапляюць на дзяржаўную службу на самую нізкую пасаду і потым цягам пэўнага часу працуюць на ёй. Сваім тыпам сістэма падобная да вайсковай або міліцэйскай, - тлумачыць суразмоўца «Салідарнасці».
Адзначым, што абвяшчэнне Менгарвыканкама выклікала цікавасць: беларусы на форумах цікавяцца, ці бяруць «дармаедаў» на гэтую пасаду: «Кадравы голад. Драздоў на ўсіх не дастаткова, а сядзець на працы па 12 гадзін або на нарах за 800 рублёў ужо мала ахвотных».