Паводле справы аб нападзе на Сяргея Чалага затрымана пяць чалавек

Следчы камітэт пракаментаваў напад на эканаміста.

Паводле факту збіцця Сяргея Чалага распачатая крымінальная справа, 5 чалавек (4 хлопцы і дзяўчына) затрыманыя, паведамілі ў СК.

Цяпер вядомы эканаміст і аўтар праграмы «Эканоміка на пальцах» знаходзіцца ў лякарні. У Следчым камітэце распавялі, што ў нядзелю была распачатая крымінальная справа паводле ч 2 арт.339 КК (Хуліганства, учыненае групай асоб). Санкцыя артыкула прадугледжвае пакаранне ад арышту да шасці гадоў пазбаўлення волі.

- Цяпер затрымана пяць чалавек, з імі працуюць следчыя, атрымліваюць ад іх сведчанні, - пракаментавала tut.by Юлія Ганчарова, афіцыйная прадстаўніца Следчага камітэта. - Пасля таго, як праца будзе закончаная, мы паведамім пра вынікі. У гэты момант нашыя супрацоўнікі разбіраюцца: хто і якую ролю прымаў у той сітуацыі, якая адбылася. Паводле папярэдняй інфармацыі, усе ўдзельнікі канфлікту знаходзіліся ў алкагольным ап'яненні.

Нагадаем, усё здарылася ў ночы з пятніцы на суботу. Сяргей Чалы, паводле ягоных слоў, разам з двума сябрамі выходзіў з бара. Праз некалькі хвілін да іх падбеглі пяць чалавек і пачалі збіваць.

- Таварышаў амаль не закранула, білі мяне. І толькі па галаве - на целе нават сінякоў няма, - распавёў Сяргей Чалы. - Яны не тое што міма праходзілі, маўляў, «дай закурыць». І ў іх не было прэтэнзій да ўсёй кампаніі. Тады б аднолькава дасталася ўсім. І гэта было не рабаванне - ні тэлефон, ні партманэт іх не цікавілі.

Як паведамляе сайт ГУУС, чатырох менчукоў, якіх падазраюць у нападзе на журналіста і яго сябра, супрацоўнікі аддзела крымінальнага вышуку Цэнтральнага РУУС затрымалі «па гарачых слядах». Аператыўныя супрацоўнікі высветлілі абставіны здарэння, гаворыцца ў інфармацыі ГУУС Менгарвыканкама, і «дакладна вядома, што гэты напад спланаваным не быў».

- У выніку апытання падазраваных высветліліся дадатковыя акалічнасці: уначы 19 траўня 2018 года ў гэтым жа двары распівала спіртныя напоі не толькі кампанія Чалага, але яшчэ і кампанія з 5 чалавек. Дзесьці а 00.30 гадзін названыя маладыя людзі ўжо надумалі разыходзіцца па дамах. Праходзячы міма кампаніі Чалага, сямейная пара, якая адстала ад сваіх сяброў, пачула на свой адрас рознага кшталту жарты, кпіны і лаянку. Прадбачачы канфлікт, муж патэлефанаваў сябрам, якія ў той час ужо ішлі паперадзе. Калі названыя грамадзяне падышлі, кампанія Чалага справакавала канфлікт, у выніку якога пачалася ўзаемная бойка, зыход якой вырашыла колькасць выпітага спіртнога і колькасць удзельнікаў, - паведамляе сайт ГУУС. - Чацвёра менчукоў, якія бралі ўдзел у названай бойцы, цяпер затрыманыя ў парадку артыкула 108 КПК Рэспублікі Беларусь ( «Затрыманне за непасрэдна ўзніклае падазрэнні ва ўчыненні злачынства») і знаходзяцца ў Цэнтральным РУУС Менска.

Сам эканаміст цяпер знаходзіцца ў лякарні.

- Напраўду, я сябе цяпер дзіўна адчуваю. Дзеянне абязбольвальных лекаў скончылася... Баліць галава з усіх бакоў, асабліва ў скронях, з вокам ёсць праблема, чакаю, калі мяне агледзіць афтальмолаг. Лекары кажуць, што днямі мяне выпішуць, - распавядае Сяргей Чалы.