«Цэх узляцеў на маіх вачах»

Відавочцы распавялі аб выбуху на заводзе пад Менскам.

Магутны выбух здарыўся ў аўторак, 22 траўня, на заводзе «Алкід» - гэта пад Менскам, у Каралёў Стане. Завод вырабляе бітумна-палімерныя эмульсіі і масцікі.

- Паведамленне пра выбух у цэху паступіла а 8:55, - распавяла kp.by афіцыйная прадстаўніца Менскай абласной управы МНС Анастасія Швайбовіч. - Была высланая тэхніка, на месцы працавалі выратавальнікі, а 9:18 пажар быў лакалізаваны.

Як высветлілася, пажар больш за гадзіну тушылі 16 пажарных разлікаў.

Карэспандэнты выдання адправіліся на месца надзвычайнага здарэння.

- У момант выбуху я знаходзіўся даслоўна за некалькі дзясяткаў метраў, стаяў тварам да гэтага цэху і размаўляў праз тэлефон, - распавёў Юры, які працуе на суседнім прадпрыемстве. - Выбух быў вельмі моцны, рэальна было страшна. Кавалкі сцен цэха даслоўна прашылі сетку паркана, паўсюды разляцеліся аскепкі...пажарныя прыехалі праз 10 хвілін і сталі тушыць.

У прэс-службе Міністэрства аховы здароўя паведамілі аб пацярпелых - чатыры чалавекі дастаўленыя ў Гарадскую клінічную лякарню хуткай медыцынскай дапамогі Менска.

- Два пацыенты ў цяжкім стане знаходзяцца ў апёкавай рэанімацыі, - сказалі ў прэс-службе. - Адзін чалавек атрымаў траўмы сярэдняй ступені цяжкасці, яшчэ адзін - лёгкай.

У аднаго з супрацоўнікаў заводу - апёкі 60% цела, у іншага - пераломы.

Паводле звестак журналістаў, трое з пацярпелых знаходзіліся непасрэдна ў цэху, яны выконвалі нейкія працы.

- Яшчэ адзін чалавек, які трапіў у лякарню, - гэта дырэктар завода, які сам дапамагаў тушыць пажар, - распавяла «Камсамолцы» крыніца.

Дырэктарам НП ТАА «Алкід» з'яўляецца Уладзімір Сахадзэ. Патэлефанаваць яму не здолелі - ягоны мабільны тэлефон недаступны. Не адказваюць і нумары прадпрыемства.

Цяпер на месцы выбуху працуюць ратавальнікі, якія разгарнулі мабільную лабараторыю хімічнага і радыяцыйнага аналізу, і следча-аператыўная група, яна ўстанаўлівае ўсе абставіны здарэння.

- Пасля праведзеных першапачатковых мерапрыемстваў Менскім раённым аддзелам Следчага камітэта распачатая крымінальная справа аб факце парушэння правілаў вытворча-тэхнічнай дысцыпліны, правілаў бяспекі выбухованебяспечных работ, што пацягнула па неасцярожнасці прычыненне цялесных пашкоджанняў, - паведаміла афіцыйная прадстаўніца УСК Менскай вобласці Таццяна Беланог. - У рамках крымінальнай справы дапытваюцца сведкі, работнікі, службовыя асобы арганізацыі, робіцца выманне абсталявання, дакументацыі, якая тычыцца вытворчага працэсу.