Юны беларус перамог у брытанскім конкурсе на найлепшы малюнак
3- 27.05.2018, 11:59
- 11,856
На малюнку Яна Мацко ёсць бел-чырвона-белы сцяг.
Беларускі школьнік Ян Мацко, які з бацькамі пражывае ва Уэльсе (Вялікабрытанія), перамог у конкурсе малюнкаў сярод каталіцкіх пачатковых школ, прыходаў і скаўцкіх арганізацый Уэльса, Англіі і Шатландыі, паведамляе «Радыё Рацыя».
Гэты агульнабрытаскі конкурс заснаваны таварыствам рыцараў Святога Калумба. Ян быў адзначаны грашовай узнагародай, а пасведчанне аб перамозе выпісаў яму галоўны магістр ордэна. Грашовы прыз, а таксама кубак, на якім пазначана імя Яна Мацко і школы-пераможцы, атрымала таксама школа, якая яго накіравала. Кубак з'яўляецца пераходным, таму будзе захоўвацца ў школе цэлы год, да наступнага конкурсу.
Да наступнага свята Нараджэння Хрыстовага ягоны малюнак будзе раздрукаваны як калядная паштоўка. Калі добра паглядзець на малюнак, то можна заўважыць і беларускі бел-чырвона-белы сцяг з правага боку.
Яну Мацко 9 гадоў, ён з'яўляецца вернікам Беларускай Грэка-каталіцкай Царквы. Юны беларус вучыцца ў школе Святога Давіда ва Уэльсе.